Европските и арапските земји, Канада и САД се чини дека се подготвени да придонесат за проценетите 70 милијарди долари потребни за обнова на Газа, изјави во вторник официјален претставник на ОН, додавајќи дека двегодишната војна таму произвела урнатини еднакви на 13 пати поголеми од пирамидите во Гиза, објави Ројтерс.
Жако Силиерс, официјален претставник на Програмата за развој на Обединетите нации, рече дека војната на Израел против Хамас генерирала најмалку 55 милиони тони урнатини и дека може да бидат потребни децении за Газа целосно да се опорави.
„Слушнавме многу позитивни вести од голем број наши партнери, вклучувајќи ги и европските партнери… Канада“ во врска со нивната подготвеност да помогнат, изјави тој на прес-конференција, додавајќи дека имало разговори и со САД.
Откако стапи на сила договорот за прекин на огнот во Газа, голем број Палестинци се вратија во урнатините на своите домови на крајбрежната територија.Огромни делови од Газа се сведени на пустелија од израелското бомбардирање во текот на две години, во кое загинаа околу 68.000 луѓе, според здравствените власти во Газа, пишува Ројтерс.
Голем дел од уништувањето е во градот Газа, место на некои од најжестоките борби. Околу 83% од сите градежни објекти таму се оштетени, според Сателитскиот центар на Обединетите нации (УНОСАТ).
УНДП соопшти дека веќе исчистила околу 81.000 тони урнатини од Појасот Газа и дека продолжува да го прави тоа.
Израел ја започна својата офанзива откако милитантите предводени од Хамас ја нападнаа земјата на 7 октомври 2023 година, убивајќи 1.200 луѓе и земајќи 251 заложник, според израелските пресметки.
Хамас ги ослободи последните живи израелски заложници од Газа во понеделник според договорот за прекин на огнот, а Израел ги испрати дома автобусите полни со палестински затвореници, додека американскиот претседател Доналд Трамп прогласи крај на двегодишната војна.
Д. Т.
