ДЕХРАН МУРАТОВ
Додека руските војници повторно отворија оган врз локацијата на нуклеарната централа Запорожје и со ракети погодија буриња за складирање на потрошеното гориво, исто така секојдневно гинат цивили (меѓу кои деца и жени) и над 3,5 милиони Украинци останаа без покрив над главата поради руската воена агресија, руската пропагандна машинерија ја дефокусира јавноста со тоа што „воената топка“ ја префла во израелско – палестинскиот конфликт.
Па, наместо граѓаните да дознаваат за теророт на руската војска во Украина, медиумите ги „бомбардираат“ со информацијата дека „Русија е длабоко загрижена за насилството и жртвите во Појасот Газа“.
„Со длабока загриженост го набљудуваме развојот на настаните кои би можеле да доведат до продолжување на воениот конфликт од целосен обем и дополнително да ја влошат и онака тешката хуманитарна ситуација во Газа“, рече портпаролката на руското Министерство за надворешни работи, Марија Захарова, повикувајќи ги сите страни на максимална воздржаност.
И руската амбасада во Египет ја оправдува воената агресија во Украина со дефокусирање на јавноста со конфликтот во Појасот Газа.
„Западот е крајно загрижен за ситуацијата во Украина, но не забележува како Израелците убиваат Палестинци и го уништуваат Појасот Газа“.
Примирјето меѓу Израел и Исламскиот џихад, што стапи во сила по жестоките воени дејствија, траеше во текот на ноќта, а израелската армија наредното утро објави дека ќе почне да ги укинува ограничувањата наметнати на жителите на областа во близина на границата на Појасот Газа.
Благодарение на дипломатското посредништво на Египет, прекинот на огнот стави крај на тридневното насилство во кое загинаа десетици Палестинци, вклучувајќи и едно петгодишно девојче.
(Цивилните) жртви се жртви без разлика дали се во Украина или во Палестина, одговорност за тоа мора да има!
