Американските и европските официјални лица веруваат дека руските разузнавачи ги упатиле соработниците на милитантната група на белата надмоќ со седиште во Русија да спроведат кампања за испраќање писма – бомби по пошта во Шпанија, во која шест писма – бомби беа испратени кон крајот на минатата година до цели од висок профил, како што е премиерот Педро Санчез. Нема загинати, но едно лице е повредено, пренесува Њу Јорк Тајмс.
Истражителите се фокусираа на Руското империјално движење, радикална група која има соработници низ Европа и центри за обука во воен стил во Санкт Петербург, соопштија официјални лица.
Се верува дека групата има врски со руските разузнавачки агенции и со екстремно десничарски шпански организации. Се знае дека важни членови на групата биле во Шпанија.
Американските власти велат дека руските офицери кои ја воделе кампањата можеби тестираат прокси групи во случај Москва да одлучи да ескалира конфликтот. Очигледната цел на акцијата беше да се сигнализира дека Русија и нејзините прокси извршители можат да извршат терористички напади низ Европа, вклучително и во главните градови на земјите-членки на НАТО.
„Ова изгледа како предупредувачки истрел“, рече Нејтан Сејлс, координатор за антитероризам на Стејт департментот во администрацијата на Трамп, кога Руското империјално движење беше прогласено за терористичка организација. „Русија испраќа сигнал дека е подготвена да користи терористички прокси за да нападне во позадинскиот дел на Западот“.
Подготви: Д. Мишев
