ЏАБИР ДЕРАЛА
Во интервјуто на ТВ Телма (11 мај) Мицкоски сѐ си кажа како што треба. Активна блокада на Собранието, според него, значи дека нема да ги блокираат законите што се за „покачување на платите, пензиите, подобар живот…“. Ете, нема да го блокираат ни заемот од 60+ милиони евра од Светска банка за општините. Ах, тие пусти пари… И предлогот за една изборна единица ќе го поддржеле, како да е нивен (предлогот е стар повеќе од една деценија и не доаѓа од нив).
Ќе ги блокирале само законите што ним не им се допаѓаат. Не знам дали е свесен, но со дефиницијата за „активна блокада“ Мицкоски апла ги призна позитивните мерки и закони во интерес на граѓанките и граѓаните. И ја објасни работата на опозицијата – да ги критикуваат грешките на власта и да се противат на законите што не се во нивен или поширок интерес. Инаку, за што ги плаќаме? Рече дека понудил и свои „експерти“ да ѝ помагаат на власта и тоа „про боно“. А бе, џанам, Каритас!
Да не заборавиме, „активна“ блокада, Мицкоски и неговата партија спроведуваат од 2017 година наваму, откако таа прва година по нивниот неславен пад, на 27 април, не им успеа обидот за државен удар со акт на терор врз Собранието. Во меѓувреме, ги блокираа сите процеси со кои Северна Македонија се врати на мапата на прогресивниот свет.
Пена им фати устата блокирајќи ги мерките и законите за покачување на минималната плата, кренаа штрајкови за дополнително да го оптоварат системот и политичкиот живот во земјата… Повеќе од една и пол година го блокираа Законот за Јавно обвинителство, сѐ уште ги блокираат судските реформи, ги блокираат реформите во образованието, изборниот систем… Здравствената ковид-криза ја поминаа во „теретана и кафана“… Значи, сѐ што не им се допаѓа, а многу нешта не им се допаѓаат, упорно го блокираат. Убаво си кажа човекот, се разбира, со негови зборови и на нему својствен начин.
Тој кажа и:
„Добар сум во математика, да.“ (Ако имате време, прочитајте за Татиниот Математичар 1, 2 и 3)
Само, не се сеќава дека е меѓународно установено дека неговата партија крадеше избори. И тоа во индустриски размери (Титаник). После четири изборни катастрофи, му тргна од рака, доби власт во половина од општините, па сега очекува да добие сѐ. Затоа што сака да биде на власт. Толку од аргументите.
Мицкоски ја пушти и Данела низ вода. Дистанцата, што ја воспостави кон неа веќе по првите сигнали дека е катастрофална градоначалничка, во интервјуто се претвори во понор.
Едноставно, тешките пропусти на неговата, до скоро, омилена Данела, го натераа во бегство и негирање на линковите меѓу неа и неговата партија пред и по локалните избори 2021. Не така одамна, во деновите кога, среде изборната кампања, некој ќе спомнеше дека Данела е независна кандидатка, најмногу се смееја самите вмровци.
И така, според Мицкоски, Данела не била кандидатка на неговата партија, туку била независна. Неговата партија нема врска со тешките пропусти во водењето на главниот град. Тој тука е формалист до максимум: Данела беше независна и точка, што има тој тука да чувствува било каква одговорност. Но затоа му пречеше кога новинарката Лупевска (на 29 септември 2020) му прочита делови од статутот на неговата партија. Тука, тој не е формалист.
Во следното интервју може да каже и дека не ја ни познава Данела. Не е убаво тоа. Па и неговата Гога (Силјановска Давкова) се пријави како „независна“ кандидатка за претседателка на државата во која не знаеше каде и кога точно се наоѓа. Но, по тешкиот изборен пораз во 2019 година, тој си ја прибра во „академско-експертските“ партиски јасли. А за Данела не сака да слушне, нејзините пропусти се само нејзини, не и на неговата партија.
Многу „наивно“, Мицкоски ја продолжува традицијата на партијата на Груевски, со стратегијата „пу-пу-не-важи“ токму по прашања каде што дебело ја упрскале.
Мицкоски, го открива, низ манипулација и алузии и својот ултра национализам. Но за тоа нека му мислат неговите коалициони другари.
Посебно забавно беше неговото признание дека премиерот Ковачевски го доживеал како „мачо политичар“. А тој да ти бил Христијан и професор. Ништо не разбираш ти, Блажо!
Една од главните поенти на Математичарот Мицкоски деновиве, па така и во интервјуто на ТВ Телма, е дека тој и неговата партија бараат промена на изборниот модел со една изборна единица. Истиот човек е автор на „големата идеја“ за 120 изборни единици. Ете, за тоа нема да го блокираат Собранието. Уште една „зелена“.