Агенцијата за млади и спорт првпат годинава организира „Саем на кариера 2018“, кој ќе се одржи денеска на Универзитет Св. „Кирил и Методиј“.
Целта на Саемот е младите да се информираат и да стапат во директен контакт со компаниите, со можност да бидат селектирани за обука, пракса или пак вработување. Тоа што настанот се одвива пред крајот на студиската година, им овозможува на студентите полесно да стапат во контакт со компании во кои можат да ја исполнат задолжителната пракса во летниот период.
Од друга страна ова е можност за компаниите да дојдат до база на податоци од студенти кои се заинтересирани за работа и пракса, со можност за потенцијални нови вработувања.
Агенцијата за млади и спорт како институција која се грижи за развој на младите и нивна интеграција во работниот процес, смета дека со ваквиот настан овозможува вмрежување на младите, институциите и бизнис секторот.
На саемот е најавено учеството на триесетина компании, како и Агенција за вработување на Република Македонија, Министерство за труд и социјална политика и Фондот за иновации и технолошки развој. Настанот е подржан од Бест Скопје и Аиесек Македонија.
Во рамки на „Саемот на кариера 2018“, ќе се одржи и панел дискусија на тема „Како до успешна кариера во македонски иновативни компании“. (MИА)
