ВЕСТ НА ДЕНОТ
Лидерите на Западен Балкан се собраа денеска во Тирана на Самит посветен на европската интеграција на регионот и спроведувањето на Планот за раст за Западен Балкан. Учесниците на самитот во Конгресната палата ги пречека албанскиот премиер Еди Рама, кој е домаќин на средбата. На самитот дојдоа премиерот на Северна Македонија, Талат Џафери, претседавачот со Советот на министри на Босна и Херцеговина, Борјана Кристо и претседателот на Србија, Александар Вучиќ. Албанските медиуми пренесоа дека претставниците на Косово и Црна Гора нема да бидат физички присутни и дека косовскиот премиер Албин Курти испратил видео порака до собирот.
Премиерот Џафери, во своето обраќање се осврна на определеноста и посветеноста на Владата на Република Северна Македонија за успешното спроведување на Планот за раст за Западен Балкан, со оглед на фактот дека овој План, потенцијално ќе го промени регионот и ќе го забрза неговото придвижување кон Европската Унија.
На Конференцијата беше усвоена заедничка изјава на лидерите од Западен Балкан, во насока на понатамошната институционална соработка меѓу државите, со прецизирање на конкретните чекори и иницијативи за реализација на оваа важна цел за квалитетот на живот на граѓаните во целиот наш регион, се вели во соопштението од Владата на Северна Македонија.
ИЗЈАВА НА ДЕНОТ
„Западен Балкан треба да биде интегриран во ЕУ, која мора да ги понуди сите придобивки од членството. Остана половина од времето за спроведување овој план, затоа регионот ќе треба брзо да напредува за да ги заврши реформите. Мора да ги примените правилата на ЕУ. Може да станете дел од европскиот пазар и пред да станете член на ЕУ, изави европскиот комесар за добрососедска политика и проширување Оливер Вархеји, на самитот Западен Балкан – ЕУ.
ВОЈНА ВО УКРАИНА
Пентагон размислува дали да го искористи последниот преостанат извор на финансирање што го има за воена помош за поддршка на воените напори на Украина против Русија дури и без гаранции дека тие средства ќе бидат надополнети од Конгресот.
ФЛЕШ ВЕСТИ
СЛОБОДА Северна Македонија во извештајот на Фридом Хаус за 2023 година бележи скок од еден поен, и понатаму останува во категоријата делумно слободни земји.
ИНТЕГРАЦИИ ЕП усвои Извештај со кој бара укинување на ветото при гласањето за проширувањето на ЕУ.
ЕНЕРГИЈА ЕСМ Снабдување со топлина денеска преку соопштение информира дека субвенции на цената на топлинска енергија за домаќинствата ќе има и во месеците јануари, фавруари, март и април.
АЛ – ПРЕС
Редакциски избор од албански медиуми: Во Тирана Самит на балканските лидери; Вучиќ побарал изјавата на Самитот за Украина да биде без „санкции против Русија“
АНАЛИЗИ
„Одамна востановен факт е дека руските специјални служби имаат искуство во спроведување масивни пропагандни операции и водење хибридни војни. Нивната пропагандна „традиција“ започнува уште во почетокот на 20-те години од минатиот век, а досега имаа цел еден век за развивање на доктрините и стратегиите за замаглување на вистината и искривување на фактите во корист на нивните воено пропагандни цели – постојано загрозување на интересите на демократскиот Запад, во прв ред САД и западноевропските држави“, пишува Џабир Дерала во анализата „ПРОПАГАНДНАТА ВОЈНА И ВЕШТАЧКАТА ИНТЕЛИГЕНЦИЈА: Најскапата операција во историјата на руските специјални служби“.
„Па, се разбира, жена“ – нè заплиснува со својата енергичност, па и лутина од екранот една пазарџика, која додава дека сите други (!), значи мажите, се покажале „фотелјаши“. Анкетата е просто уфрлена во стартот на утринската програма на Македонската телевизија, кога очекувате вести кои треба да ви бидат ориентир за тој ден со вести да проодноста на патиштата, ќе има ли некој кварт струја и вода…, пишува Љубир Костовски во анализата „БАЛАНСИРАНО ИЗВЕСТУВАЊЕ: Како „неутралните“ телевизии ги селектираат вестите?“.
Подготви: Б. Јордановска
