Учесниците на Седмиот работен состанок за социјална интеграција на Ромите во Македонија, по вчерашната работа, денеска ќе ги презентираат резултатите од работилницата, информира МИА.
По презентацијата ќе следи усвојување на заклучоците од овој Работен состанок. Предвидено е обраќање на премиерот Зоран Заев.
Работниот состанок е во организација на кабинетот на министерот без ресор задолжен за имплементација на Стратегијата за подобрување на состојбата на Ромите во Република Македонија, Самка Ибраимовски, министерството за труд и социјална политика, Секретаријатот за европски прашања и канцеларијата на Делегацијата на ЕУ во Скопје.
Одржувањето на ваквиот работен состанок претставува продолжување на состаноците иницирани од страна на Генералниот директорат за проширување при Европската комисија, како дел од низата одржани состаноци од ваков тип во регионот.
Учесници на овој Работен состанок се претставници на релевантните институции, невладините организации, донаторската заедница како претставници од Директоратот за проширување.
Семинарите за Роми кои во Република Македонија се спроведуваат од 2011 имаат цел да се следи степенот на нивната интеграција во општеството како ранлива група граѓани.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
