ВЕСТ НА ДЕНОТ: Заев и Ахмети постигнаа договор за формирање на нова влада
СДСМ и ДУИ постигнаа коалициски договор за создавање на парламентарно мнозинство и состав на новата Влада со полн мандат, соопшти мандатарот Зоран Заев. Тој вели дека во следните 4 години ќе работи посветено на интересите на државата.
„Дел од принципите на кои се темели новиот коалициски договор се: Одговорни и отчетни кадри за сите ресори, рамноправно учество на мажи и жени во извршната власт, нема да се предлагаат министри без ресор, јакнење на економскиот стандард, неселективно борба со криминалот и корупцијата на сите нивоа, проверка на имотот на функционерите и намалување на привилегиите, зголемувањена транспарентноста и отчетноста на сите нивоа на власта, заштитата на животната средина. Ќе се укине пржинската влада, ќе се измени изборниот модел, ќе се намали обемот на администрацијата за 20 проценти, а сите вработени по Рамковен договор ќе тргнат на работа“, изјави Заев, по средбата со Ахмети.
Договорот ќе биде претставен пред највисоките органи на СДСМ и ДУИ.
И лидерот на ДИУ, Али Ахмети истакна дека е постигнат договор за нова влада и на крај порача „Господ да ни е на помош“.
Mандатарот Зоран Заев ќе биде премиер во следните четири години, а ДУИ ќе може да предложи премиер-Албанец во последните 100 дена од новата влада. Ова е договорот што го постигнале Заев и Ахмети за клучната позиција, која е предизборно ветување на интегративците.
ЦИВИЛНИ ВЕСТИ
ЦИВИЛ организира серија панел дискусии и други онлајн настани со заеднички наслов „Национализам“ во вторник и среда, 18-19 август 2020, со почеток во 10 часот, кој ќе се пренесува во живо на Фејсбук страницата на организацијата. Настаните се дел од најновата акција на ЦИВИЛ „Граѓански форум за учество во креирање на владините политики“.
Програмата започна со едночасовна панел дискусија со универзитетските професорки Мирјана Најчевска и Виолета Петровска Бешка. Со почеток во 11:30 се одржа панел дискусијата со Петрит Сарачини (ЦИВИЛ) и Филип Стојановски (Фондација Метаморфозис). Активистите Јане Ѓорѓиоски и Ариан Мехмети разговараа на темата во терминот од 13 до 14 часот.
Активистот Бранимир Јовановиќ говори за национализмот и социјалната правда.
Утре во 10:30 часот на програмата е Џевдет Хајредини, експерт за финансии и колумнист, ќе има панел дискусија во 12 часот со Дехран Муратов, ЦИВИЛ, Фари Хисени од МОФ, актерката Владанка Димовска како и Самет. Претседателот на ЦИВИЛ, Џабир Дерала ќе одржи јавна презентација.
ФЛЕШ ВЕСТИ
Учебната 2020/2021 ќе почне со онлајн-настава освен за учениците од прво до трето одделение и во училишта со помал број ученици и паралелки во средини со стабилна епидемиолошка состојба, за што општините ќе добиваат согласности од Владата. Ова беше и конечен предлог на Комисијата за заразни болести, а одлуката денеска на седница ја донесе Владата.
Довербата на граѓаните во институциите се гради и заслужува само преку одговорна политика и бескомпромисна борба со оние што ги кршат законите, независно од нивната функција и моќ. Ако не сме еднакви сите пред законот и ако политичката власт се користи за личното, а не за јавното добро, таквата држава нема перспектива, порача денеска претседателот и врховен командант, Стево Пендаровски, во обраќањето по повод Денот на Армијата.
Претседавачот на Собранието Талат Џафери изјави дека ќе закаже продолжение на конститутивната седница штом добие потврда дека партиите ги решиле двете останати прашања – избор на претседател на законодавниот дом и комисија за избори и именувања.
Д. Муратов
