Како се приближува вториот круг на локалните избори, така се вжештуваат и препукувањата меѓу двата главни опоненти, СДСМ и ВМРО-ДПМНЕ.
Од 35 општини што влегоа во вториот круг, во 18 од нив, кандидатите за градоначалници на СДСМ и ВМРО-ДПМНЕ ќе се борат за превласт на локално ниво.
И додека за едните тоа е само едно убава круна на веќе добиената победа, за другите, доказ дека имало изборни нерегуларности и дека локланите избори се далеку до фер и демократски.
Или, според секојдневните известувања од опозицијата, локалните избори се далеку од кредибилни, односно се чист криминал.
Во меѓувреме, верниот и „ранобуден“ татко на општина Штип, Илчо Захариев, има многу малку време да докаже дека она што граѓаниките и граѓаните,, заслепени, го гледаат како кал и буниште, отсекогаш било мед и млеко.
Неговиот опонент Благој Бочварски, кандидатот за градоначалник на СДСМ, ја доби и поддршката од ВМРО НП.
Како што изјави Заев, коалицијата е потврдена на централно ниво.
„Јас верувам дека дополнителната поддршка од граѓаните, симпатизери, поддржувачи на Народна партија, ќе ја зајакнат самата разлика, која што сакаме да ја направиме во вториот изборен круг, гледајќи напред пред перспективите, коишто доаѓаат и за Штип и за целиот наш источен регион“, потенцираше Заев.
А колкаво е тоа зајакнување во број на гласови, сигурно Захариев веќе ја направил математиката, со оглед дека добро му оди со бројки. Барем со нулите, кога станува збор за сиромаштијата, невработеноста, работничките права и останатите локални (не) проблеми.
Б.Ј.
