Илчо Захариев, градоначалник кој секое утро во 5 часот наутро започнува со работа и е на располагање на сограѓан(к)ите, не беше во можност за време на посетата на тимовите на ЦИВИЛ – Центар за слобода на Штип, да даде видео-интервју за ЦИВИЛ Медиа. Од неговиот кабинет ни беа побарани прашања во писмена форма, по што ни стигна одговор дека поради набиената агенда, одговорите на градоначалникот на прашањата на тема социјална правда, работнички права и екологија, ЦИВИЛ Медиа ќе ги добие, исто така, во писмена форма.
ЦИВИЛ Медиа: Дали постои социјална правда во Штип и дали имате слух за барањата на граѓаните?
ЗАХАРИЕВ: Морам да ви кажам дека сме единствена општина каде градоначалникот доаѓа во 5 часот наутро и има средби со граѓаните уште од почеток на денот. Нема потреба граѓаните да се најавуваат за да дојдат во кабинетот на градоначалникот. Секој кој дошол е примен и му е излезено максимално во пресрет. Над 15.000 граѓани за овие четири години поминале тука, што е речиси четвртина од градот! Генерално, на сите граѓани, без оглед дали доаѓаат заради социјалниот статус, комунален, здравствен или фамилијарен проблем, градоначалникот и службите им излегуваат во пресрет.
Според транспарентноста, во повеќе истражувања Штип е меѓу првите пет општини во Македонија, а од економски аспект, сме шести град по перспективи за развој и живот во Југоисточна Европа, според истражување кое е направено и објавено во угледниот „Фајненшал тајмс“. Мојот личен став е, нека има богати, но не смее да има сиромаси! Јакнењето на средната класа е предуслов за одличен живот и тоа е наша заложба, всушност, во нашиот град имаме само 2.000 невработени, од кои само 1.000 активно бараат работа. Конечно, во нашиот град нема деца кои питачат по улиците, немаме лица без дом, а Општината се грижи за околу 300 граѓани кои се сместени во колективни центри, на кои им плаќа струја, вода, затоплување, и обезбедува делумно храна и секако, лекови.
ЦИВИЛ Медиа: Колку се заштитени работничките права, со оглед на многуте жалби на вработените, посебно во текстилната индустрија, на мобинг и притисоци?
ЗАХАРИЕВ: Не знам дали сте информирани како ЦИВИЛ, но постои Закон за работни односи (ЗРО) кој ги дефинира правата на работниците и надлежноста на Општината во тој дел е минимална, односно, немаме надлежност. За тоа се одговорни Трудовата, Пазарната инспекција, кои треба да си ја вршат работата според законот. Во Штип доминира текстилната индустрија и поголемиот дел од конфекциите имаат одговорен однос кон вработените, хумани услови за работа, работа само во прва смена.
Не сакам да набројувам, но има такви конфекции како што се „Семак фешан“, „Ва-Бо“, „Албатрос“ и други. Ако има нарушување на правата на работниците, мобинг и притисоци, ќе треба да се обратите во Трудова инспекција или во Пазарна, кои имаат податоци за пријавите и тие се надлежни за решавање на овие проблеми.
Текстилната индустрија вработува над 8.000 луѓе и во поглед на платите – тие се во пораст, а до Општината од вработените досега нема жалби за мобинг или по друг основ. Секако дека ние како Општина се залагаме за почитување на работничките права, за почитување на ЗРО и на работното време, а прекувременото работење да се плаќа согласно законите.
ЦИВИЛ Медиа: Кој е најголемиот еколошки проблем во Штип и што се презема на тој план?
ЗАХАРИЕВ: Морам да кажам дека имаме здрава животна средина, градот е среден и чист , уреден со многу зеленило и на тоа Општината обрнува големо внимание. Индустријата е лесна и незагадувачка, немаме тешка индустрија и немаме капацитети кои загадуваат. Најголем еколошки проблем е неконтролираната сеча на дрва во потплачковичкиот регион, каде лица од ромска националност, секојдневно уништуваат и приватни, но и државни шуми. Последиците можат да бидат катастрофални, затоа што се менува амбиентот, ќе има влијание на климата. И ерозијата која ќе настапи и евентуалните поплави можат да бидат со катастрофални последици по градот. Интервениравме во Министерството за земјоделство и шумарство, во ЈП за шуми, во Шумската полиција и уверени сме дека ќе се најде крај на оваа еко-катастрофа. Исечени се бесправно и на диво, илјадници хектари шуми. Други еколошки проблеми немаме.
Биљана Јордановска
Интервјуто е дел од проектот „Општество без граници“, што ЦИВИЛ – Центар за слобода го спроведува со поддршка од германската Фондација „Хајнрих Бел“. Целта на проектот е промовирање и едукација на граѓанките и граѓаните на Македонија за „Граѓанската повелба“, глобален документ за унапредување на граѓанските права и на активното учество на граѓаните во процесите на одлучување.
