Скопскиот Кривичен суд на својата веб-страна го објави решението за притвор на бизнисменот Сеад Кочан, каде е наведено дека „се наложува на овластените службени лица од МВР, по пронаоѓање и лишување од слобода на осомничениот С.К., да го спроведат на издржување на мерката притвор во Истражниот затвор „Скопје“.
Адвокатот Никола Додевски, кој го застапува Сеад Кочан, денеска изјави дека одбраната и обвинетите немаат добиено никакво решение за притвор и додека тоа не се случи, тој е слободен човек.
Денеска се одложи и судењето за случајот со насилството пред Општина Центар.
Судијката Татјана Михајлова го одложи денешното рочиште поради неисполнети законски претпоставки. Денеска во судот не се појавија ниту поранешниот премиер Никола Груевски, ниту ексминистерот за транспорт и врски Миле Јанакиевски и експратеничката Даниела Рангелова, ниту единаесетемина други обвинети.
Експремиерот Никола Груевски, не ги прима ниту поканите за негово сослушување во проширувањето на истрагата за „Титаник“. Имено, неговото обезбедување, кое го користи и по заминувањето од премиерската фукција, во неколку наврати не дозволило да му се врачи поканата од Специјалното јавно обвинителство!
Градоначалникот на Општина Центар Андреј Жерновски, по денешното одложување на рочиштето за случајот поврзан со неговата општина, вели дека е неопходен генерален реизбор во судството.
„Груевски со далечински управувач го управува судството и обвинителството. Сваровски судиите и платените обвинители се под негова комплетна контрола. Затоа, власта во заминување се однесува како што сака.
Првиот случај за насилството во Општина Центар ни открива како ќе се водат сите постапки отворени од СЈО. Јасно ни демонстрира во која мера може да се манипулираат и одложуваат процесите. Со вакви инсталации во системот, со чесни исклучоци, тешко дека насилниците ќе одговараат онака како што заслужуваат. На Македонија и’ е неопходен генерален реизбор на судии и цврсти механизми за спречување на контролата и влијанието врз судството. Понатамошното опстојување на Груевски на политичката сцена ја носи земјата во уште поголема криза“, напиша Жерновски на својот Фејсбук профил.
Опструкциите врз работата на Специјалното јавно обвинителство се потврдија и вчера, кога претседателот на Советот на јавни обвинители Петар Аневски побара од Специјалната јавна обвинителка Катица Јанева, смена на специјалните обвинители во случајот со насилството во Општина Центар.
Маја Ивановска
