Мислам дека се движиме опасно, не само кон назадување на демократијата, туку и кон една сериозна политичка, па и безбедносна нестабилност, како држава, посочи Сефер Селими од Democracy Lab и аналитичар, на панел дискусијата на ЦИВИЛ – „Демократско назадување: Импликации и последици“.
Многу непријатно сум изненаден како нашето општество свесно го игнорира сиот обид на оваа влада, да ги наруши меѓуетничките односи, и се задоволува само со тоа да покаже дека сите искажани критики во тој правец, доаѓаат од една политичка партија која изгубила власт, па сега плаче за да си ја врати. Мислам дека оваа влада не знам дали е свесно влезена во тој процес, не знам кои се крајните цали на оваа влада, но ги нарушува двата столба на нашата современа држава, а тоа се меѓуетничките односи, споделување на моќта што ја воспоставува рамнотежата во оваа држава како мултиетничка и на сите граѓани, а не „Македонија на Македонците“, што низ историјата се покажа дека не може така да функционира и не е здраво општество, преку нарушување на Охридскиот договор, и тука ги имате сите примери, вели Селими.
Селими се осврнува на два столба врз кои се потпира нашиот политички систем, и посочува и кон нарушување на Охридскиот договор, како еден од двата столба.
И вториот столб, кој не здружува сите како граѓани, е суспензијата на процесот на интеграција во Европската Унија, и врз кој се потпира нашиот систем, со кој се предизвикува реакција. А која ќе биде таа ракција допрва ќе видиме, вели Селими.
Демократијата умира секогаш кога има безбедносни предизвици, и затоа имам дилеми зошто оваа влада удира токму на овие два столбови, дали е тоа за да се воспостави авторитарен режим, кој наликува со тој на нашиот нов стратешки партнер Орбан, и реплика на режимот на Вучиќ во Србија, или ова го прави несвесно, незрело, од немање чувство што тоа може да предизвика, посочува меѓу другото Селими.
Во однос на медиумите и невладините организации, Селими упати критики дека речиси и да нема телевизија која објективно ја следи работата на владата, и дека очигледна е автоцензурата во медиумите. Додека за невладините организации посочи дека недостасува реален ангажман, а критичката маса се сведува на индивидуалци.
Гледаме дека веќе нема цензура, туку има автоцензура во медиумите. Не гледам некоја телевизија која критично се однесува и ја следи објективно работата на оваа влада, а невладиниот сектор веќе како да не постои, недостасува реален ангажман од нашите колеги кои би се залагале и во отсуство на фондови, и гледаме дека нашата критичка маса веќе не е маса, туку се индивидуалци кои тешко дека можат да пробијат во јавниот простор, посочи на крајот Сефер Селими.
Д. Тахири
Камера: Атанас Петровски
Монтажа: Ариан Мехмети
Фотографија: Б. Јордановска – ЦИВИЛ
Панелот е дел од меѓународната конференција “Одбрана на демократијата: Боиште на вистината“, како дел од проектот „Демократски навигатор“, поддржан од Сојузното министерство за надворешни работи на Сојузна Република Германија.
