Меѓународниот ден за прекинување на неказнивоста за насилството против новинарите во Македонија може слободно да се одбележи со бројка од 54 напади врз новинарите во последните пет години.
Само со почетокот на оваа година, во контекст на промените на политичката сцена може да се наведат дел од нападите врз новинарите, а со тоа и на медиумската слобода во Македонија.
Вклучувајќи ги нападите и врз новинари на 27 април во Собранието, во текот на годината настрадаа новинарски екипи на А1он, 24 вести, Нова ТВ и Тв Телма.
Независно дали се работи за вербален или физички напад, во Македонија нема тенденција за решавање на случаите и казнување на сторителите.
„Пред еден месец добивме еден извештај кој го чекавме 8 години, да видиме колку напади врз новинари имаме и што имаат преземено органите на полицијата и обвинителството, а судовите да ги казнуваат овие насилници и видовме дека бројките се загрижувачки. Од 54 напади на новинари, ниеден насилник не е изведен пред лицето на правдата. Ова е еклатантен пример на постоење на политика на неказнивост на насилството на новинари. Тоа е многу загрижувачки“, изјави Насер Селмани за ЦИВИЛ Медиа.
Ограничувањето на медиумската слобода е пракса од која медиумите очекуваат, со промената на власта да замине во неповрат. Конечно, медиумите и новинарството треба да бидат јавен информативен сервис на граѓанките и граѓаните, слободни во изразувањето и движењето, а не објекти за политички манипулации и корист, до моментот кога ќе нема потреба од тоа, паќе станат предмет на насилство.
А, со манипулација во медиумите се манипулира и со информациите кои протекуваат во јавноста, од што најмногу, како и секогаш страдаат граѓанките и граѓаните.
Една од препораките, како што појасни Селмани, е расветлување на сите случаи на насилство врз новинарите. Со ова ќе се покаже дека законот се спроведува и ќе служи како предупредување за сите што ќе кренат рака на медиумските слободи и слободата на изразување.
Биљана Јордановска
Камера: Дехран Муратов
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
