Бранко Петровски од бруталниот напад пред две недели од Чорогунов, денеска кончено излегува од болница, само за да го пресретне поплака за јавен ред и мир поради гласната музика од „Гарсон“, нешто што не се случило во 13 години постоење од никого што работи во близина или што живее во зградите околу кафулето.
Како што напиша синот на Петровски на неговиот Фејсбук профил, ова е само почеток на притисоците.
„Фирмата на напаѓачот на татко ми, Спиро Чорогунов, денес достави писмо до куќниот совет на зградата во која сме кираџии дека пречи музиката од кафе барот „Гарсон“ на нивните гости. Дури клеветат дека работиме подолго од дозволеното работно време, и дека имаме нелегално поставена тераса. Иста онаа тераса која е таму 13 години и за која на ниеден инспектор не му текнало да реагира!? „Гарсон“ во таа зграда е 13 години и за тој временски период ниту еден станар не упатил поплака, ниту за тераса ниту за гласна музика, а најмалку за прекувремено работење. Најсмешниот дел во писмово е последниот, каде објаснува Чорогунов преку своите “пиуни” како човек треба да се однесува во градски урбани средини. Јавно му порачувам да ја види повторно фотографијата на татко ми. Така најдобро ќе сфати како не треба!“, пишува синот на Петровски на својот фејсбук профил.
Имено, во дописот се молат сопствениците што го издале просторот на кафулето „Гарсон“ да преземат соодветни мерки и да ги опоменат своите закупци да престанат со несоодветното однесување.
Според очевидци, на 18 мај, Спиро Чорогунов, сопственик на хотел „Александар 2“, го извршил нападот врз Петровски во најнепосредна близина на хотелот, кој се наоѓа во непосредна близина и на кафулето „Гарсон“ и на менувачницата. Тешкиот инцидент се случил среде бел ден во строгиот центар на градот, кога Чорогунов му ја фрла малата табла со реклама за менувачницата што таму стои цели 19 години. Откако Петровски се обидува да ја врати таблата, Чорогунов го нападнал со тупаници, го кутнал на земја и продолжил силно да го удира во пределот на лицето, со што му нанел скршеници на вилицата, носот и во пределот на десното око.
ЦИВИЛ ќе продолжи да го следи случајот и понатаму додека правдата не биде задоволена. Семејството на Петровски има целосна поддршка и од организацијата и од јавноста, но сѐ уште се чека институциите да реагираат и брзо да го решат случајот.