Скопскиот градоначалник Петре Шилегов на вчерашното затворање на фестивалот „Синедејс“, што се одржа на зелениот покрив на Градскиот трговски центар-ГТЦ, го повика претседателот Стево Пендаровски заедно да го уредат покривот на овој култен објект во Скопје.
– Фестивалот CINEDAYS не само што успешно ја пребродува короната, туку тоа го прави и на најдобриот можен начин, реоткривајќи ги културните простори во Скопје. Дел од проекциите на фестивалот се одржаа пред поранешните кина Маџари, Влае, Кисела Вода, Напредок. И еве сме, пред еден предизвик. Јас сум спремен, претседателе Пендаровски, како градоначалник да го финансирам проектирањето и ве повикувам вас, заедно да го уредиме овој простор како нов културен простор, а во име на кандидатурата на нашиот град за Европска престолнина на културата во 2028 година – изјави градоначалникот Шилегов.
Тој го повика претседателот Пендаровски да биде покровител, додека Градот Скопје би бил реализатор на проект со кој покривот на ГТЦ би прераснал во нов културен простор во главниот град.
Шилегов изрази убедување дека Градот Скопје ја оправдува довербата на граѓаните кога е во прашање културниот живот во Скопје.
– Верувам и дека за неколку години од сега со гордост ќе ја носиме титулата Европска престолнина на културата. Особено ми е драго што вечерва се наоѓаме на покривот на култниот објект во нашиот град – Градскиот трговски центар, кој не само што успеавме да го сочуваме од барокното лудило, туку успеавме и да го зазелениме, повторно да го заживееме, а згора на тоа и да го отвориме овој простор за нови културни настани – додаде Шилегов.
Инаку, Градот Скопје во соработка со УНДП лани успеа да изведе зелен покрив на ГТЦ, но само на еден дел од површината што ја зазема ова здание. Останатиот дел од покривот на ГТЦ во изминатиов период остана нереконструиран, но затоа од година во година се зголемува бројот на културни манифестации што се одржуваат на оваа локација, меѓу кои кино проекции и концерти./ МЕТА
