Портпаролката на руското Министерство за надворешни работи, Марија Захарова, изјави дека дури и по референдумот за промена на името, Западот сè уште се обидува да ја вовлече Македонија во НАТО.
Нејзината реакција доаѓа по изјавата на генералниот секретар на НАТО, Јенс Столтенберг, дека на почетокот на 2019 Алијансата ќе ја прими Македонија во своите редови. Захарова смета дека тоа е недозволиво и дека првин треба Македонија и Грција да донесат одлука.
Како што јавува ТАСС, Захарова смета дека ако се зборува за немешање во внатрешните работи, тогаш не смее да се агитира „за“ и „против“ кога станува збор за референдуми.
„Ако зборуваме за немешање во внатрешните работи и почитување на законот, вклучувајќи ги и меѓународните, тогаш првиот човек на еден блок од држави не смее да говори за одлука што треба да ја донесе парламентот на една земја, изјави портпаролот на руското Министерство за надворешни работи“, изјавила Захарова.
Исто така, руските медиуми пренесуваат дека била изненадена од наодите на комисијата на ОБСЕ, што го следеа одржувањето на референдум во Македонија поставувајќи го прашањето што ќе се случеше доколку Русија ги повикаше Македонците да гласаат. Според неа, тоа веднаш ќе се смета за мешање во внатрешните работи. Па така, вели Захарова, пропагандната кампања на Западот покажува двојни стандарди и злоупотреба на социјалните правила и норми.
Но, што е проблематично со оваа изјава, праша професорката Мирјана Најчевска, на својот Фејсбук профил.
Како што вели Најчевска, самите изразивме желба за влез во НАТО, а не обратно дека тие не викнале да влеземе во нивната структура.
„ЕУ и НАТО се посакувани структури за најголем број од граѓаните. Толку се посакувани што влегле и во изборните ветувања. Западните држави не се мешаат во внатрешните работи туку во оние нешта кои претставуваат дел од процесот на влез во нивните структури. Ние самите сме се изјасниле дека сакаме да ги исполниме условите за влез и тие ни укажуваат на начинот како да го направиме тоа“, објаснува Најчевска.
Што се однесува на влијанието на Русија и како што вели Захарова, нејзиното стоење настрана, Најчевска додава дека Русија е онаа што работи спротивно на меѓународното право и таа е онаа што даде поддршка за бојкот на референдумот.
„Русија се меша во нашите внатрешни работи и постапува спротивно на меѓународното право со тоа што ни го оспорува правото сами да си решиме за нашиот влез во сојуз во кој таа не се наоѓа. Русија ќе имаше право да ги стимулира граѓаните да излезат на референдум доколку сакавме да влеземе во некој сојуз во кој се наоѓа таа. Поддршката на Русија на бојкотот е поддршка на неупотребата на демократските алатки односно поддршка на недемократијата“, разјаснува Најчевска.
Б. Ј.
