Во овој предизборен период, граѓаните слушаат од политичарите разно-разни ветувања и предвидувања, кои честопати не се остваруваат. Но, во изминатите епизоди на „Кратки нозе“, не се занимаваме со остварливоста на ветувањата и предвидувањата на политичарите, кои се предмет на друга методологија што ја користат повеќе страници и проверувачи на факти во земјава и регионот.
Откако ќе помине извесен временски период, овие „вистиномери“ анализираат дали дадената прогноза или некое ветување на одреден политичар е реализирано и во колкав процент, дали е остварено целосно, делумно или воопшто не е остварено. Кратки нозе, за разлика од тоа, се фокусираат на изнесените факти, на она што некој го тврди дека е сегашна состојба или дека се случило во минатото.
Затоа, не ги анализиравме предвидувањата на премиерот Заев за победа во првиот изборен круг на локалните избори, ниту пак најавите на лидерот на опозицијата Мицкоски за победа на претходните избори или пак за формирање на ново парламентарно мнозинство. Тие предвидувања не се остварија, но кога беа дадени, тие не претставуваа факти, туку прогнози и мислења на политичките лидери за иднината, кои излегоа погрешни и неточни.
Но, „Кратки нозе“, како во оваа, така и во наредните епизоди ќе продолжи да се занимава со она што политичарите го претставуваат како податок или факт, како нешто што е вистина во сегашноста или минатото, но не е вистина, претставува неточен податок или манипулација со вистината.
Прогнозите за иднината може да се остварат или да не се остварат. Но, фактите се неприкосновени. Тие на публиката треба да и се презентираат на вистинит начин, без извртување и без манипулации. Тоа е она што сметаме дека го заслужува публиката, и ништо помалку од тоа.
Петрит Сарачини