Покрај очекувањата дека Комисијата за деловнички прашања и мандатно-имунитетни прашања уште вчера ќе ја започне расправата за барањата за одземање на имунитет на пратениците, таа се закажа за денеска на пладне.
На денешната расправа ќе се одлучува за имунитетот на пратениците Крсто Мукоски, Јохан Тарчуловски, Љубен Арнаудов, Жаклина Пешевска, Сашо Василевски и Љупчо Димовски кои се осомничени за учество во насилствата во Собранието на 27 април.
Претседателот на Собранието, Талат Џафери ги доставил барањата за одобрување на притвор до Kомисијата.
Двајца пратеници од осомничените, Тарчуловски и Мукоски, се членови на Комисијата и тие треба да бидат заменети со други. Заменици на членовите од ВМРО-ДПМНЕ се пратениците Владимир Ѓорѓев, Невенка Стаменковска, Никола Попоски и Зоран Ѓорѓиевски. Претседател на Комисијата е пратеникот Павле Богоевски.
Според Деловникот на Собранието, пратеникот има имунитет од денот на верификација до денот на престанок на мандатот. Надлежниот орган бара одобрување на барање за притвор на пратеник до претседателот на Собранието. Претседателот на Собранието, понатаму, барањето го доставува до Комисијата за деловнички и мандатно-имунитетни прашања, која во рок од два дена треба да достави извештај. Врз основа на извештајот Собранието треба да одлучи во рок од три дена за барањето за притвор на пратеникот. За тоа да се случи потребно е мнозинство од 61 пратеник.
Кривичниот суд вчера соопшти дека од 24 лица повикани на распит мерка притвор од 30 дена им одредил на 13 осомничени, додека шестмина од осомничените добија куќен притвор. Од Судот информираа дека за пратениците кои се осомничени, судијата на претходна постапка ќе пристапи кон одлучување по предлогот на обвинителството откако Собранието ќе расправа за одземање на нивниот имунитет. За останатите лица кои се опфатени во предлогот, а не биле на распит Судот се уште нема добиено известие за причините поради кои не е постапено по наредбите за нивно приведување.
Дел од правниците потенцираат дека воопшто немало потреба од тоа Комисијата да расправа за имунитетот на пратениците бидејќи според законот, пратеничкиот имунитет не важи доколку за делото кое му се препишува на пратеникот предвидената минимална казна е пет години затвор. Во овој случај Судот само треба да го извести Собранието за покренатите постапки и за барањата за притвор.
Во меѓувреме претседателот на Демократскиот сојуз побара денешната расправа да биде отворена за јавноста преку директен пренос.
„Граѓаните беа сведоци кога се одвиваа крвавите настани на 27 април во Парламентот, обидот за државен удар и насилно загрозување на демократски институции, поради што сосема е логично и оправдано, сите активности поврзани со расчистување на овие настани да се одвиваат транспарентно и пред очите на јавноста. Граѓаните мора да бидат еднакви пред законот, а имунитетот не смее и не може да се користи за попречување на правдата“, изјави Трајанов.
Тој додаде дека пратениците кои беа дел од сценариото за дестабилизација на државата и воведување на воена состојба немаат морален кредибилитет да седат во парламентарните клупи, а уште помалку да се повикуваат и сокриваат зад пратеничкиот имунитет.
М. Ивановска
