„Службеник весник“ доцна синоќа, во најновиот број, ја отпечати Одлуката со која парламентарното мнозинство на 27, април, 2017 година, на „црниот четврток“, го избра и изгласа пратеникот на ДУИ, Талат Џафери за нов претседател на Собранието на Република Македонија. Со потврдата на легитимноста на изборот на Џафери, прекинува мандатот на претходниот парламентарен спикер, Трајко Вељаноски, што значи дека седниците во иднина ќе ги закажува новоизбраниот претседател на Собранието.
Објавувањето на оваа Одлука во „Службен весник“ доаѓа 11 дена по изборот на Џафери на продолжената конститутивна седница и пет дена откако дописот со Одлуката, потпишана од заменик генералниот секретар на Собранието, Неџбедин Ибраими и од претседавачите на собраниската седница, Ферид Мухиќ и Горан Мисовски, е испратена до „Службен весник“.
Имајќи го предвид фактот дека легитимноста на Одлуката се заокружува со нејзиното објавување во „Службен весник“, според досегашната практика биле печатени и вонредни изданија, но тоа не беше случај овој пат, така што Одлуката „чекаше“ во фиока неколку дена, до синоќа.
Следниот чекор на патот кон конституирањето на новата власт, е во рацете на претседателот на државата, Ѓорге Иванов. Спикерот Џафери треба да го извести Иванов, а тој како што соопштија од неговиот кабинет, по средбата со Хојт Ји, ќе постапи согласно со Уставот и востановената практика. Следниве 10 дена, претседателот Иванов треба, според очекувањата, мандатот да му го додели на лидерот на СДСМ, Зоран Заев, којшто ја има довербата да биде мандатар на новата влада.
Изборот на Џафери за нов собраниски спикер, го следат настаните од „крвавиот“ четврток, што ќе останат запишани во современата македонска историја. Неколку илјади граѓани, пред сѐ членови и симпатизери на ВМРО-ДПМНЕ, членови на иницијативата „За заедничка Македонија“, беа пропуштени од собраниското обезбедување. Во налетот на гнев и омраза, а истрагата ќе покаже дали и по претходно сценарио, повредија пратеници и новинари, што со вклучени камери вршеа и директен пренос од оваа голгота. Меѓу нив, најтешки повреди добија лидерот на СДСМ, Зоран Заев, а особено лидерот на ДР на ДПА, Зијадин Села, којшто поради здобиените тешки повреди, десетина дена беше на болничко лекување во Тетово.
Во МВР и Јавното обвинителство во тек се истражни постапки за сторените кривични дела против бројни демонстранти од редовите на иницијативата „За заедничка Македонија“, меѓу нив и поранешни сторители на кривични дела, со издржани затворски казни и добро познати на МВР.
Моника Талеска
