Иако во Северна Македонија веќе се отстранети од јавните кабелски мрежи програмите руските гласила Раша Тудеј и Спутник, сепак, ширењето на руската пропаганда во земјава најде други канали на дејствување.
Руските медиуми во нашата земја не се единствените кои ја шират руската пропаганда и ја оправдуваат воената агресија врз Украина, туку тоа го прават и одредени македонски медиуми и портали.
Таков е вчерашниот случај, кога преку тенденциозен и сензационалистички наслов, една новинска агенција и неколку информативни портали објавија видео вест со наратив кој дезинформира и поттикнува недоверба во НАТО алијансата, чија членка е и Северна Македонија, и сака да отвори сомнеж за оправданоста на дејствувањето на НАТО сојузниците во поддршката и одбраната на Украина.
Реномираната македонска новинска агенција Макфакс беше првата која објави вест базирана на видео кое на Јутјуб го објави белорускиот канал „by“ со седиште во Брест.
Во насловот, првично објавен на Макфакс, пишува: „(ВИДЕО) Грците нападнаа конвој на НАТО и американските сили- пукале на оклопните возила во возот за Полска“.
Информацијата потоа беше преземена и од неколку етаблирани информативн портали: Фокус, Фактор, МТМ, кои со истиот, или со мали варијации во насловот, и подолу во текстот на веста, го пренесуваат истиот наратив дека Грците го нападнале конвојот на НАТО и „пукале“ на него.
Доколку се погледне видеото, може да се види дека станува збор за две/три лица со качулки, како покрај пругата по која поминува конвојот фрлаат со црвена боја врз композицијата со НАТО тенкови. Оваа вест се потврдува како лажна и со самиот наслов на Јутјуб видеото, во кое на руски се вели дека „нападот е со црвена боја“. Не може да се најде информација, ниту да се види од видеото дека станува збор за вооружен напад и пукање, како што сугерираат посочените македонски медиуми во насловот на веста.
Со ваквиот наслов сака да се сугерира дека, ете, и Грција, членка на НАТО е против алијансата и американските сили кои испраќаат помош за своите членки од источното крило во непосредна близина на Украина, со што ја шират руската пропаганда за оправданоста на руската агресија и дека, всушност, западот и НАТО се вистинските поттикнувачи на војната.
Оваа дезинформација беше објавена вчера, 2 Април, на Меѓународниот ден за проверка на факти, кој за разлика од претходни години, годинава одбележувањето се одвива во сенка на војната во Украина, и се прават напори за разобличување на дезинформациите и пропагандата како дел од специјалната војна во Украина која се води паралелно со вистинската.
Цивил е првата платформа во земјата што од самиот почеток континуирано ги следи, детектира, разоткрива и разобличува дезинформациите и говорот на омраза во врска со воената агресија врз Украина.
Драган Мишев
