Специјалното јавно обвинителство во соопштение до јавноста ги демантира обвинувањата што денеска ги изнесе ВМРО-ДПМНЕ, во однос на нивната работа, поврзано со одуката за притвор на сопственикот на ТВ „Нова“, Сеад Кочан.
„Најостро ги демантираме наводите за поврзаност на ова Јавно обвинителство со СДСМ, искажани во денешното соопштение на ВМРО-ДПМНЕ. Во оваа пригода, укажуваме дека Јавното обвинителство, како независна и професионална институција, е формирано со Закон за кој во Собранието на Република Македонија, гласаа вкупно 111 пратеници, вклучително и пратениците од партијата ВМРО-ДПМНЕ“, стои во соопштението на СЈО.
Претходно, ВМРО–ДПМНЕ го обвини СЈО за блиски релации во својата работа со СДСМ.
„Овој чин е обид за задушување на демократијата и на медиумските слободи во Македонија. Овој чин ќе биде сериозен удар врз медиумските слободи во Македонија. ВМРО-ДПМНЕ нема да остане рамнодушна на ваквата политика на СДСМ, која како поразена на изборите – не дошла на власт, но преку СЈО, каде што е на власт од првиот ден на неговото формирање, веќе практикува крајно недемократско владеење, задушување на медиумските слободи, кршење на законите и погазување на демократијата“, се вели во денешното соопштение на ВМРО-ДПМНЕ.
ВМРО-ДПМНЕ им се закани на судиите – „независно дали се под притисок на СДСМ или, пак, од која било причина сакаат да го задоволат Зоран Заев и неговиот сценарист, дека треба да работат во согласност со законот и со Уставот и дека не смеат да се претворат во политичка алатка на СДСМ и на СЈО. Секое незаконско работење ќе подлежи на одговорност и секој во оваа држава треба да е еднаков пред законите, вклучително и судиите“. Од ВМРО-ДПМНЕ предупредуваат дека доколку СЈО продолжи да бара притвор за бизнисменот Сеад Кочан, сопственик на ТВ „Нова“, партијата ќе преземе мерки, што би значеле мешање во работата на судската власт.
„Доколку се подлегне на притисокот и на политичките влијанија од СДСМ и незаконски се потврди притвор, сé додека тој трае, ВМРО-ДПМНЕ во знак на протест – ќе ги преземе сите расположливи политички и демократски мерки и чекори во правец на спречување на недемократско однесување на СДСМ, која е на власт во СЈО и целосно управува со него и го контролира“, предупредува ВМРО-ДПМНЕ, потенцирајќи дека притворот на Кочан би ја продлабочил кризата.
Покрај СЈО, со реакција на соопштението на ВМРО-ДПМНЕ, се огласи и СДСМ.
„Паднаа маските на Никола Груевски и на ВМРО-ДПМНЕ. Соопштението во коешто ВМРО-ДПМНЕ го штити медиумскиот и бизнис-партнер на Груевски, Сеад Кочан, потврдува дека сè што прави оваа партија, има единствена цел, заштита на нивните криминали и лично стекнатите богатства. Секој кој работел противзаконски, мора да понесе одговорност“, пишува во реакцијата на СДСМ.
По објавувањето на соопштението на ВМРО-ДПМНЕ, мала група на граѓан(к)и, според дел од медиумите, вработени во фирмите на Кочан, и припадници на бошњачката заедница, се собраа пред Основното јавно обвинителство, како знак на поддршка на сопственикот. Како што за ЦИВИЛ Медиа изјави Зеќир Рамчиловиќ, пратеник од коалицијата „За подобра Македонија“, предводена од ВМРО-ДПМНЕ, нивното барање било „правда и почитување на правните начела и принципи, и донесување на правична, а не политичка одлука“.
Марија Теговска
Дехран Муратов