Денот на планетата Земја (22 април), граѓанската иницијатива „О2 Коалиција за чист воздух“, го одбележа со спонтан собир во борбата против загадениот воздух. Собирот започна во 12 часот, пред „Школка“ во Градскиот парк во Скопје.
Како што информираат од „О2 Коалицијата“, целта на иницијативата е „заеднички да се избориме да го добиеме тоа што ни е загарантирано со Уставот, а тоа е – здрава и чиста животна средина“.
На собирот се зборуваше за граѓанскиот активизам и за последиците од загадениот воздух. За најмладите учесници на собирот имаше и детско катче, а собирот ќе заврши со заедничка акција за чистење на паркот.
„Во Македонија веќе одамна не се посветува речиси никакво внимание на животната средина. Според последните податоци, најголем еколошки стресор/хазард во Скопје е аерозагадувањето… При процена на оптовареноста со заболувања, предизвикани од високи концентрации на PM2,5, според пресметките на Институтот за јавно здравје, во услови на просечни годишни концентрации од 48,4 μg/m3 PM2,5 во 2012 година се изгубени 4.174 години живот кај граѓаните на Скопје (82/10.000 жители), како резултат на смртност од рак на белите дробови“, истакнаа иницијаторите во најавата на протестот, цитирајќи ја „Стратегијата за климатски промени на Градот Скопје“.
Собирот е поддржан и од Здружението за заштита на животни и животна средина „Е.Д.Е.Н.“ и Првата детска амбасада „Меѓаши“.
Текст и фото: Марија Теговска
