Вчера вечер, некаде после 23 часот, на Меѓународниот аеродром Скопје, со лет преку Тбилиси, Грузија, пристигнаа првите 149 граѓанки и граѓани од Авганистан што ќе бидат прифатени во нашата земја. По пристигнувањето на авионот со авганистанските бегалци, од кои повеќето жени и деца, прва излезе бремена жена во 39-тата недела од бременоста, која со возило на Итна медицинска помош беше однесена на Клиниката за гинекологија во Скопје. Меѓу патниците биле уште четири бремени жени, изјави Милица Бубало, раководителка на Итната медицинска помош , а уште едно лице, најверојатно поради колапс, беше преземено од екипите на Итната медицинска помош.
Најважно е сите ние, Владата, меѓутоа и граѓаните да ја покажеме солидарноста за овие граѓани коишто денеска со насолзени очи се симнаа на овој аеродром од солзи и од среќа затоа што најдоа место каде што ќе бидат безбедни најмалку во наредните 90 дена до кога имаат престојувалиште овде во Република Северна Македонија. Ние сме дале согласност засега за 750 граѓани, жени и деца со име и презиме коишто беа претходно најавени и проверени дека се дел од меѓународните организации со кои сме соработувале, рече Османи.
На граѓаните од Авганистан, кои во земјава ќе имаат статус на лица со привремен престој, ќе им биде издадена виза за привремен престој до 90 дена, а потоа ќе треба да заминат во САД или на друга безбедна дестинација. Тие ќе бидат сместени во хотели и мотели, а трошоците за нивниот престој ќе ги покријат САД и меѓународните организации.
На сите што слетаа синоќа од Авганистан во земјава, ќе им бидат направени лекарски прегледи и ПЦР тестови, а доколку има некој позитивен на коронавирус ќе биде ставен во двонеделен карантин. Невакцинираните кои ќе сакаат да се вакцинираат, може да добијат и вакцина.
Виктор Димовски, директор на Агенцијата за национална безбедност посочува дека Агенцијата ги презема сите неопходните оперативни активности и мерки за организирано и безбедно прифаќање на цивилното население од Авганистан, како и за навремено превенирање и спречување од можни закани и ризици. Според него, пласирањето на лажни вести и дезинформации има за цел да се внесе страв и паника кај граѓаните , разгорување на национализам и дестабилизација, но сепак, вели тој, ваквите активности и повици не наидуваат на очекуваниот одзив што зборува за зрелоста на нашите граѓани и нивната демонстрирана емпатија и подготвеност за солидарност.
Вчерашното пристигнување на првите евакуирани граѓани од Авганистан во земјава, се пренесуваше и во живо преку стриминг на неколку македонски портали, на чии страници, во коментарите, во кој за среќа преовладуваа оние со позитивна конотација имаше и онакви кои со крајно дегутантен и нехуман вокабулар, преку навреди, закани, дисквалификации, лажни вести, манипулации и говор на омраза, се трудеа од петни жили овој хуман настан да го прикажат во крајно негативно светло. Ваквата негативна нарација, за жал, ја преземаа и раширија и неколку портали на нивните страници и профили на социјалните мрежи.
Сепак, овие обиди не наидоа на плодна почва кај повеќето наши граѓани, кои го препознаа и го осудија ваквиот говор на омраза, и пружија поддршка и се солидаризираа со несреќата која му се случува на цивилното население од Авганистан, кое под смртна закана од Талибанците е приморано да ја напушти својата земја.
Со свое соопштение во раните утрински часови излезе ЦИВИЛ – Центар за слобода во кое изразува целосна солидарност, сочувство и добредојде на граѓанките и граѓаните од Авганистан, вработени во граѓанскиот сектор, сојузничките мисии, медиумски и други организации и нивните семејства, кои пристигнаа во нашата земја.
Мишев Драган
