Tри капитални објекти на МВР 2017-2023 – ИКТ центар за чување и заштита на податоци и за опоравување од катастрофи во Прилеп, nајсовремена форензичка лабораторија на Балканот и нова Полициската станица Аеродром, објави денеска министерот за внатрешни работи Оливер Спасовкси на неговиот Фејсбук профил.
– Ова се низа суштествени, реформски и програмски зафати во рамки на Министерството за внатрешни работи што ги подготвувавме и реализиравме изминативе години, и бездруго заземаат значајно место во напорите за квалитативно унапредување на модерното полициско работење. Продолжуваме!, напиша Спасовски на Фејсбук.
Информира дека ИКТ центар за чување и заштита на податоци и за опоравување од катастрофи во Прилеп, е финансиран со 3,25 милиони евра од претпристапната помош на ИПА фондовите и со 150.000 евра од Министерството за внатрешни работи.
– Како краен корисник на овој капитален објект – Центарот ќе биде back-up (резервна база) за клучните, витални информациски системи во земјава и ќе гарантира дека тие ќе функционираат доколку од какви било причини е загрозена работата на примарниот информатички систем и исто така ќе ги зачува податоците во случај на природни или катастрофи предизвикани од страна на човечки фактор, појаснува Спасовски.
Во однос на најсовремената форензичка лабораторија на Балканот, во Оддел за криминалистичко–технички испитувања и вештачења, министерот напиша дека станува збор за објект што ќе биде опремен согласно сите најнови европски полициски стандарди во доменот на крим-техниката, односно форензиката. Или, попластично кажано, наведува Спасовски, објект што реално претставува есенција во полициско-истражителското дејствување, така што со право очекуваме, во голема мерка да се подигнат на уште повисоко ниво не само професионалните стандарди, туку и конкретните ефекти на овој дел од оперативното полициско работење.
– Со изградбата на овој објект конечно се унапредуваат условите за работа на крим-техничките работници во нови лабораториски и канцелариски простории. Го фаќаме чекорот со современите постапки во оваа сфера и нивна хармонизација со најдобрите европски практики и стандарди – Проект за чија што реализација во рамки на ИПА програмата за 2016 година се издвоени потребните над три милиони евра. Очекуваме објектот да биде пуштен во употреба наскоро, објави Спасовски.
Новата Полициската станица Аеродром, е трет објект во низата нови градби на Министерството за внатрешни работи, што воедно е енергетско ефикасен објект. Предвидениот рок за изградба на објектот, напиша министерот Спасовски, е 30 месеци од денот на воведување во работа на економските оператори изведувач и надзор, со вкупна вредност од околу 130.000.000 денари со вклучено ДДВ, предвидени од буџетот на Република Северна Македонија.
