Претставници на Средношколскиот пленум од Битола, во разговор за ЦИВИЛ Медиа, го критикуваат и се оградуваат од бојкотот на настава – за вклучување и поддршка на средношколците од Битола, на протестите на иницијативата „За заедничка Македонија“.
Нивната реакција следува по текстот што го објави ЦИВИЛ Медиа, за вчерашните активности во средното техничко училиште „Ѓорѓи Наумов“ од Битола, кога професор и демонстратор за одржување на компјутерите, вработени во училиштето од редовите на Унија на млади сили на ВМРО–ДПМНЕ, преку пораки во затворена ФБ-група, во која дел се и учениците од прва, втора и трета година кои се малолетни лица, ги повикуваат учениците да не одат на настава, и со тоа да ја изразат поддршката за барањата на „За заедничка Македонија“.
„Апсолутно се оградуваме од бојкотот во средното техничко училиште и остро ја критикуваме постапката. Средношколски пленум – Битола е составен од средношколци од различни етникуми и вери, и како такво здружение, пред две години се залагавме за решавање на заедничките проблеми што ги засегаат сите средношколци. И, дури и кога настанувале какви било конфликти и дилеми, тие биле од политичка природа, односно, дилеми поради различните политички гледишта. Од една страна, изненадени сме од оваа постапка на техничкото училиште, бидејќи голем дел од активистите беа токму ученици на техничкото училиште, кои сега слушаат трета и четврта година. Но, дури и тогаш, токму таму беше концентрирана една група средношколци од која постојано добивавме клевети и закани, група што постојано се обидуваше да не’ саботира во нашата борба, со кинење и чкртање на промотивните летоци и плакати кои служеа за ширење на идејата на Пленумот. Средношколски пленум – Битола не поддржува било какви иницијативи што предизвикуваат етнички конфликти“, се вели во одговорот на Средношколскиот пленум испратен до ЦИВИЛ Медиа.
Марија Теговска
