Светската агенција Ројтерс објави сторија за бројните нови гробишта на припадниците на озлогласената приватна армија „Група Вагнер“ во едно село во јужниот дел на Русија. Новите гробови даваат увид во профилот на припадниците на „Група Вагнер“ кои се борат – и умираат во огромен број – за злосторничката приватната армија на Јевгениј Пригожин.
Истражувачките новинарски екипи во соработка со Ројтерс, откриваат дека кон крајот на минатото лето (2022), празна парцела на работ на мала земјоделска заедница во јужна Русија почна да се полни со голем број нови гробови на борците убиени во Украина.
„Почивалиштата беа украсени со едноставни дрвени крстови и венци со светли бои кои ги носеа ознаките на руската групација Вагнер – страшна и таинствена приватна армија“, пишува во извештајот на Ројтерс објавен на 26 јанураи.
Имаше околу 200 гробови на локацијата на периферијата на селото Бакинскаја во регионот Краснодар, кога Ројтерс го посети кон крајот на јануари. Новинската агенција ги усогласи имињата на најмалку 39 од загинатите и на три други блиски гробишта со руските судски записи, јавно достапните бази на податоци и сметките на социјалните мрежи. Ројтерс разговараше и со семејствата, пријателите и адвокатите на некои од загинатите.
Многу од мажите закопани во Бакинскаја беа осуденици кои беа регрутирани од „Вагнер“ минатата година, откако неговиот основач, Евгениј Пригожин, вети помилување доколку затворениците преживеат шест месеци на фронтот, покажува извештајот на Ројтерс. Меѓу нив имало еден платен убиец, убијци, криминалци од кариера и луѓе со проблеми со алкохолот.
Со месеци, Вагнер е заглавен во крвава битка до истребување, за да ги заземе градовите Бахмут и Соледар во источниот украински регион Донецк. Западните и украинските извори јавуваат дека „Вагнер“ ги користи осудениците како топовско месо за да ја совладаат одбраната на Украина. Портпаролот на Белата куќа за национална безбедност Џон Кирби, најавувајќи заострување на санкциите за оваа група, ја нарече „криминална организација која врши широко распространети злосторства и кршење на човековите права“. Во краткиот јавен одговор до владата на САД, Пригожин побара од Кирби „да објасни какво злосторство е извршено“ од Вагнер.
Но тоа не е сè. Бројни се сведоштвата за тоа дека „вагнеровците“ често ги оставаат телата на своите паднати соборци да се распаднат.
Извор: REUTERS
