Американскиот Стејт департмент го означи македонскиот бизнисмен и поранешен вицепремиер на Република Северна Македонија, за неподобен за влез во САД. Во соопштението се наведува дека ознаката е поради вмешаност во значителна корупција, односно злоупотреба на службената должност додека беше вицепремиер, во корист на приватни деловни интереси.
Покрај Анѓушев, САД ги означија и членовите на неговото потесно семејство сопругата Елизабета и децата, Ангел и Огнен, како генерално неподобни за влез во Соединетите држави.
„Соединетите Држави го означуваат Кочо Анѓушев, поранешен вицепремиер на Северна Македонија, како генерално неподобен за влез во Соединетите држави, поради неговата вмешаност во значителна корупција. Додека ја извршуваше функцијата вицепремиер, Анѓушев ја злоупотреби својата службена положба во корист на неговите приватни деловни интереси, поткопувајќи ја довербата на јавноста во Северна Македонија во нивните владини институции и јавни процеси.
Денешната акција ја потврдува посветеноста на САД, дека стојат со оние во Северна Македонија кои бараат одговорност од корумпирани јавни функционери, се наведува во соопштението.
„Оваа ознака ја потврдува посветеноста на САД за борба против корупцијата, која му штети на јавниот интерес, го попречува економскиот просперитет на земјите и ја намалува способноста на владите ефективно да одговорат на потребите на својот народ.“, се наведува во соопштението од Стејт Департментот.“
На црната листа на САД, поради корупција, претходно се најдоа и Никола Груевски, Сашо Мијалков, Рамиз Мерко, Орце Камчев, Ратка Камчева и Сергеј Самсоненко.
Фото: Принтскрин
