Вицепремиерот и министер за политички систем, Иван Стоилковиќ ќе покрене иницијатива на владина седница да го разреши директорот на Инспекторат за употреба на јазици, Арсим Идризи, бидејќи го крши законот кој треба да го штити, најави на поткастот „На Кавга со Иван“, на Канал 5, откако водителот му покажа снимка каде што Идризи одбива да им одговори на прашањата на новинарите на македонски јазик.
„Во вторник на наредната владина седница ќе биде разрешен. На прашањето – сигурно ќе биде разрешен, Стоилковиќ одговори – „99 отсто“.
Од ДУИ истакнуваат дека власта преку серија институционални чекори, системски го отстранува албанскиот јазик од јавната сфера.
„Скандалот е продлабочен од страна на Министерот за политички систем, (Стоилковиќ) кој вчера изјави дека ќе го смени директорот на Инспекторатот не поради неработење, туку за да му го покаже местото. Оваа изјава е директна демонстрација на институционален притисок и понижување врз службената употреба на албанскиот јазик“, велат од ДУИ.
Од ДУИ потенцираат дека албанскиот јазик не е политичка привилегија, тој е уставна категорија и дел од темелите на Охридскиот договор.
Д. Муратов
