Неколку стотици цивили и студенти се собраа во Нови Сад вчера за да ја одбележат 30-годишнината од операцијата „Олуја “ ( Бура), и да им оддадат почит на жртвите од таа хрватска воено-полициска акција, пишува РСЕ на српски јазик.
Студентите што ги блокираа факултетите во тој град повикаа на прошетка и собирање на една од најпрометните раскрсници во градот, а беа поддржани од граѓани собрани на неформални собири.
„Не ги забораваме злосторствата без казна. Никогаш повеќе, никој повеќе“, рекоа студентите во блокадата.
Невладината организација Документа идентификуваше повеќе од 2.300 жртви, претежно српски цивили, а во зависност од изворот, проценките за бројот на Срби што ја напуштиле Хрватска за време на операцијата „Бура“ во 1995 година се движат од 130.000 до 250.000.
Студентите изјавија дека точниот број на жртви и протерани луѓе не е познат дури ни 30 години подоцна „бидејќи ниту живите ниту мртвите не се важни за убиствените режими“, пишува РСЕ.
Ден претходно, на 3 август, во Сремски Карловци се одржа официјална церемонија по повод „Бурата“.
Таа беше заеднички организирана од Србија и босанско-херцеговскиот ентитет Република Српска.
Студентите што ги блокираа факултетите во Нови Сад го оценија тој настан како злоупотреба на трагедијата.
Во 1990-тите, за време на војните во поранешна Југославија, на власт беше Социјалистичката партија на Србија, чиј лидер во тоа време беше Слободан Милошевиќ.
Милошевиќ беше обвинет пред Меѓународниот трибунал во Хаг за геноцид и воени злосторства во Хрватска, Босна и Херцеговина и Косово во текот на 1990-тите. Сепак, тој никогаш не ја виде пресудата, бидејќи почина во притвор за време на судењето во 2006 година.
Социјалистичката партија на Србија е сè уште дел од владејачката коалиција во Србија денес.
