ЦИВИЛ Медиа разговараше со Ирена Стеријовска, активистка, за слободата на изразување и како таа може да придонесе за општествено добро.
Што подразбирате по слобода на изразувањето, медиумски слободи и активизам?
Стеријовска: Во суштина тоа е метод за да се стигне до општокорисна вистина, до вистината воопшто. Во таа смисла ја гледам како простор во која луѓето можат активно да учествуваат, мислам на активистите, новинарите…, со свој придонес да оформат некакви политики за општо добро. Еден популарен американски stand-up комичар рече дека политичката коректност на крајот ќе ја убие демократијата. Она што е битно да се знае е дека слободата на говор не треба да обременува туку да го штити општеството од негативните влијанија на јавниот говор.
Во тој контекст сметам дека секој кој јавно се изразува треба да ја земе предвид сопствената одговорност и она што може таа да предизвика. Исто така, треба да биде доследен на себе си и на своите верувања и најчесто тоа подразбира една борба со сите интереси сопствени и на другиот, зборувам од сопственото искуство и искуството на други луѓе.
Слободата на говор никогаш до крај не може да биде реализирана како апсолутна вредност, но сметам дека е стремеж кој секој треба да го брка…
Дали се соочувате со притисоци од политичките и бизнис центрите на моќта и како се справувате со нив?
Стеријовска: Како еден од поактивните учесници на Шарена револуција и претходно во повеќе формални и неформални граѓански иницијативи сум се соочила, но не толку од политички центри на моќ, туку го почувствував негативното влијание на јавниот говор, што доведува до негативни емоции и атмосфера. Мене лично не ми се заканиле, барем не од релевантни политички фактори, но ми се заканиле луѓе чиј говор на омраза бил јавно таргетиран.
Јас не верувам дека одбегнувањето на конфликт е ситуација во која кој било победува. Од такви ситуации може само да се научи. И колку и да звучело апсурдно во моментот да се влегува во такви ситуации сум се обидувала на цивилизиран начин да ги решам конфликтите. Човек треба да биде доследен на сопствената логика…
Кои се вашите препораки во контекст на слободата на изразување?
Стеријовска: Сметам дека голем дел од општествените и цивилизациски придобивки светот полесно може да ги присвои како свои, ако повеќе чинители од различни страни покажат дека одреден став може да придонесе за општествено добро…
Маја Ивановска
Камера: Дехран Муратов