Преставници на Студентскиот пленум се сретнаа со министерката за образование Рената Дескоска, со која разговараа – студентите да земат активно учество во реформите во високото образование.
„Идејата на состанокот беше да направиме некоја ретроспектива на последните три години, што се случи во високото образование, и особено, за најголемиот проблем што најмногу нас не засега, студентското организирање. Тој проблем ние го начнавме уште пред некоја година, меѓутоа, сега мислам дека сме конечно блиску до неговото решавање“, изјави за ЦИВИЛ Медиа, Деа Здравковска од Студентскиот пленум.
Таа додава дека со министерката за образование дискутирале за подобрување на студентскиот стандард, но и за решавање на проблемот со нефункционалните студентски правобранители.
„За да се решат дел од овие проблеми, министерката сака да направи комисија во која ќе бидат вклучени и двајца членови од Студентскиот пленум. Комисијата ќе работи на комплетно нов закон за високо образование, во кој ќе бидат вметнати сите проблематики што треба да се решат, односно Студентскиот парламент нема да биде невладина организација која учествува во телата на Универзитетот, туку ќе биде тело во рамките на Универзитетот“, потенцира Здравковска.
Таа истакна дека сакаат да продолжат да работат транспарентно и јавно и ќе ја мотивираат и самата министерка да работи во тој процес.
„Но, сакам да потсетам дека Студентски пленум не се формираше за да ја турне претходната власт, туку да ја критикува секоја онаа што носи непросмислени и лоши реформи кои немаат заднина во областа на образованието. Затоа, ќе ја потсетуваме и новата министерка дека ние сме тука кога ќе направи некој лош чекор“, децидна е нашата соговорничка.
Министерката Дескоска најави ревидирање на учебниците, вклучувајќи ги и оние по историја. Според неа, не смее да се дозволи учениците да учат од погрешни учебници што ги туркаат кон дискриминаторски предрасуди и говор на омраза…
„Ревизијата на сите учебници ќе биде дел од еден процес што ќе биде дебатиран на експертско ниво. Јас во моментов, во Министерството имам добиено претставка од Народниот правобранител за учебник по општество којшто содржи дискриминаторски одредби. Со оглед на тоа што јавноста честопати беше соочена со примери на учебници во коишто имаме погрешни констатации, каде што има говор на омраза, каде што има дискриминаторски ставови и предрасуди, значи, сите учебници ќе бидат отворени на процес на ревизија во целокупното образование, со цел да се отстранат грешките коишто учениците ги учат“, посочи министерката и информира дека за овој случај е формирана работна група во Министерството.
Дехран Муратов