ВЕСТ НА ДЕНОТ
Судењето за случајот „Ласкарци“ вратенo на почеток
По повеќе од една година супер-вевештачења за автобуската несреќа кај село Ласкарци во која загинаа 16 лица, конечно се изготвија и беа доставени до Кривичниот суд Скопје, судскиот процес за овој случај денеска започна од почеток. Почетокот на судењето беше само формален, бидејќи сите присутни се согласија материјалните докази во постапката само да бидат прочитани и судењето да продолжи онаму каде што застана во првичната постапка.
ИЗЈАВА НА ДЕНОТ
Џафери вели дека избори нема да го решат проблемот со мнозинството за уставни измени
Претседателот на Собранието Талат Џафери денеска на брифинг со новинарите изјави дека постапката за уставни измени најдоцна би требало да почне во јуни – јули годинава за да заврши до ноември, кога завршува и скринингот од ЕУ. Џафери рече дека не мисли дека избори ќе го решат проблемот со немањето доволно гласови (80) за уставни измени, туку дека тоа ќе ја искомпилицира целата работа. За тоа како да се надмине проблемот со мнозинството претседателот на Собранието вели, власта и опозицијата да седнат да разговараат.
ФЛЕШ ВЕСТИ
РЕАКЦИЈА Експертот за политички прашања, универзитетскиот професор Милазим Красниќи од Приштина, за Цивил Медиа истакна дека Европската Унија вложила многу напори, но најмногу со она што го нарекуваме технички дијалог и резултатите не биле добри, дури и оние договори кои се постигнати и потпишани не се целосно имплементирани. Поради оваа причина, имаше голема фрустрација во Европската унија, но фрустрацијата и загриженоста се зголемија уште повеќе по почетокот на војната во Украина, бидејќи веќе се виде дека се активни руските политики за дестабилизација на Балканот.
ПЛАТЕНИЦИ Смртоносна и за една употреба: Бруталните тактики на Вагнер во Украина откриени во разузнавачки извештај
ПОЛИТИКА Претседателката на ЛДП и пратеничка Моника Зајкова денеска изјави дека на вчерашната средба на премиерот Димитар Ковачевски со лидерите на коалициски партнери на СДСМ, разговарале меѓудругото и за можноста за окрупнување на владиното мнозинство, а дали ќе дадат поддршка за тоа Алијансата за Албанците да влезе во владината коалиција, вели, ќе зависи од програмските цели на таа коалиција.
СТРУЈА Во РЕК Битола нема дефект на Блок 1, ниту било какви други сериозни проблеми на некоја од постројките, истакнуваат од АД ЕСМ, Подружница РЕК Битола во демантот на информациите што во јавноста ги пласира ВМРО – ДПМНЕ.
СРЕДБА За Северна Македонија 2023 година е значајна во однос на напредокот по европскиот пат, поради што е неопходна и кохезија околу реализацијата на оваа државна стратешка цел, констарирале на денешната средба премиерот Димитар Ковачевски и шефот на Делегацијата на ЕУ во земјава Дејвид Гир. На состанокот е разговарано за актуелни прашања од значење за земјава, регионот и пошироко, во европски контекст, соопшти владината прес-служба.
ВОЈНА ВО УКРАИНА
Германски Рајнметал подготвен да испрати 139 тенкови Леопард во Украина, американските борбени возила Бредли ќе пристигнат во наредните недели
Германскиот воено-индустриски концерн Рајнметал е подготвен да испрати 139 тенкови Леопард во Украина штом германската влада даде соодветна дозвола, изјави прес секретарот на концернот за германската медиумска група РНД, пренесува Укринформ. Рајнметал е подготвен да предаде 29 тенкови Леопард 2А4 наменети за „кружна размена“ во април-мај оваа година. Според секретарот за печат, ќе биде потребна речиси една година за да се поправат уште 22 Леопарди од истата модификација и ќе биде можно да се предадат кон крајот на 2023 или почетокот на 2024 година.
(ИЗБОР) Албански медиуми
Албанија рамо до рамо со Косово за територијалниот интегритет, Курти не се справува добро со односите со САД, моделот „две Германии“ е добро решение за договор.
СЛОБОДНА ЗОНА
Иако претседателот на државата Стево Пендаровски во изјавата за медиумите после седницата на Советот за безбедност одржана на 23 јануари рече дека таа била посветена на „безбедносната состојба во Република Северна Македонија и евро-атлантскиот регион“, и според редоследот како што ги наведе – претседавањето на нашата држава со ОБСЕ во чиј фокус е најголемата безбедносна закана после Втората светска војна заради воената агресија на Русија и ситуацијата на Косово, беше сосема јасно дека овој пат највисокото државно тело за безбедносни прашања, за централна тема го имаше „најновиот развој на настаните во односите со Бугарија“, пишува Зоран Бојаровски во колумната „Специјалните операции“ против Македонија се „готват“ надвор со извршители од внатре“
Старо правило е дека не се Бугарите проблем во Македонија, туку бугарашите. А такавите, освен заблудени поединци, се создаваат во Македонија по потреба или по нарачка. Прашањето е само кој е инспираторот или нарачателот на овие групи и во кој даден момент прераснуваат во здруженија или отвораат клубови со провокативни имиња. Нивната цел очигледно не е само да провоцираат, туку прераснуваат и во акции што имаат субверзивен карактер, што значи имаат за цел да предизвикаат и дестабилизирачки ефекти во државата, пишува Љубиша Николовски во колумната „Бугар на Бугара му е ВМРО-вец, или како ВМРО-ДПМНЕ се врати на бугарашките позиции“
С.Танеска
