И денес албанските медиуми во регионот се задржуваат на темата Српско- Косовски договор, албанскиот претседател Бајрам Бегај вели дека го поддржува зачувувањето на неповредливост и територијален интегритет, поранешниот амбасадор на ОБСЕ за Косово, Вилијам Вокер изјави дека косовскиот премиер Курти не се справува добро со односите со САД. Ова е дел од изборот на редакцијата на ЦИВИЛ Медиа за денешниот АЛ-Прес.
ИНФОКУС – Бегај: Албанија е рамо до рамо со Косово, го цени зачувувањето на неповредливост и територијален интегритет
„Претседателот на Албанија, Бајрам Бегај, изјави дека го поддржуваат Косово и го ценат зачувувањето на неповредливоста и територијалниот интегритет на државата. На состанокот на Советот за национална безбедност Бегај рече дека Албанија го поддржува дијалогот Косово-Србија за постигнување конечен договор што ќе доведе до меѓусебно признавање.“, пренесе албанскиот медиум Инфокус.
ГАЗЕТА ЕКСПРЕС: Вокер вели дека Курти не се справува добро со односите со САД
„Поранешниот амбасадор на Верификациската мисија на ОБСЕ на Косово, Вилијам Вокер, смета дека премиерот на Косово, Албин Курти не се справува добро со односите со Соединетите Американски Држави.
Тој го цени Курти за, како што вели, борбата против корупцијата, но вели дека има резерви за пристапот на Курти кон односите со САД.“, пренесе косовскиот портал Газета Експрес.
ИНСАЈДЕРИ Договорот Косово-Србија, Ишингер: Добро би било конечно да се имплементира моделот „две Германии“
„Поранешниот германски дипломат и поранешен претставник на ЕУ во преговорите за Косово, Волфганг Ишингер, смета дека би било добро да се спроведе предлогот од 2007 година за решение на косовското прашање, договорот меѓу двете Германии.
Ишингер на својот Твитер профил објави и напис од „Франкфуртер алгемајне цајтунг“ (ФАЗ) со наслов „Преговори во Белград – како Западот има намера да го реши косовскиот конфликт“.“, пренесе косовскиот медиум Инсајдери.
ТЕЛЕГРАФИ: Србите на север ќе протестираат против политиката на Вучиќ
„Граѓанската иницијатива „Српски опстанок“ апелираше за што поголемо учество на протестот в среда што ќе се одржи на северот на Митровица.
Според организаторите, протестот ќе се одржи против, како што ја нарекуваат, деструктивната политика на српскиот претседател Александар Вучиќ во разговорите и безусловното прифаќање на новиот договор.“, пренесе косовскиот медиум Телеграфи.
БОТА СОТ: „Доколку се потпише француско-германскиот план, на Вучиќ и Курти ќе им биде доделена Нобеловата награда за мир“
„Несомнено е дека француско-германскиот план би го спасил Балканот од „земјотресите“ на новите освојувачки војни на Србија. Затоа, неговото прифаќање од страна на премиерот на Владата на Косово, Албин Курти, и од претседателот на Србија, Александер Вучиќ, на нивните државни средби на високо ниво со членовите на Квинтитот на ЕУ и Америка (г. Габриел Ескобар ), што го имаа минатата недела во Приштина и во Белград.“, извадок од колумната „Доколку се потпише француско-германскиот план, на Вучиќ и Курти ќе им биде доделена Нобеловата награда за мир“, од проф. Д-р. Мехди Хисени, објавена во косовскиот дневник Бота Сот.
Д. Тахири
