Целиот тим на ЦИВИЛ и дел од најблиските соработнички и соработници, поминаа три дена во Велес, исполнети со голем број на активности на терен и на семинар за стратешко планирање и обука. На терен, дел од тимот на ЦИВИЛ отвори информативен штанд за директна комуникација со граѓанките и граѓаните, а спроведе и анкети на повеќе прашања. Воедно, тимот направи и неколку интервјуа и одржа состаноци со претставници на граѓанските организации и на власта во Велес.
На инфо-штандот на ЦИВИЛ граѓан(к)ите имаа можност да се запознаат со активностите на тимот и да ги искажат своите размислувања и забелешки што се однесуваат на политиките и пракитките на локалната и централната власт. Меѓу другото, граѓанките и граѓаните имаа можност да ги споделат своите ставови за иницијативата на Владата да ги вклучи децата со посебни образовни потреби во редовниот образовен процес.
Тимот на ЦИВИЛ разговараше со градоначалникот на Општина Велес, Аце Коцевски, за очекувањата на велешани, можностите на Општината, транспарентноста и одговорноста, неговата лична, како градоначалник, но и на локалната самоуправа, како и за односот меѓу локалната и централаната власт во сроведување на предвидените и ветени локални реформи на локалните избори.
„Општина Велес е една од општините за пример според транспарентноста во работењето… Работиме на план за интегритет на општината, тоа го нема никоја општина во државата и верувам дека во наредниот период уште подобро ќе ги поставиме работите за да биде отчетноста и транспарентноста на уште повисоко ниво од тоа што го имаме сега“, изјави Коцевски за ЦИВИЛ Медиа.
ЦИВИЛ направи и интервју со граѓанската активистка Славица Ќучукова и со координаторката на советничка група на ВМРО-ДПМНЕ во Општина Велес, Нада Трајкова.
Проектот „Граѓански објектив: Транспарентност и одговорност во политичките процеси“ е финансиран од National Endowment for Democracy.
А. Петровска
