Државите треба да ги зголемат годишните трошоци за обезбедување на безбедна вода за пиење и канализација за четири пати! Во извештајот на Светската банка што го објави Ројтерс се вели дека зголемените напори ќе придонесат за намалување на детските болести и на смртноста, истовремено стимулирајќи го економскиот раст.
Милиони луѓе во светот секојдневно се во стапицата на сиромаштијата, поради недоволните резерви на чиста вода за пиење и поради недостигот на систем на канализација, стои во извештајот. Потребни се повеќе ресурси за решавање на најранливите области и за подобрување на квалитетот на водата и услугите за канализација. Според Светската банка, цената на чиста вода за пиење достигнала до 150 милијарди долари годишно.
„Над три четвртини од луѓето без снабдување со вода за пиење, живеат во рурални средини каде што само 20 проценти од луѓето имаат пристап до подобрена канализација. Во градовите, сиромашните луѓе имаат три пати помалку шанси да имаат пристап до вода за пиење отколку луѓето што живеат во побогати области“, стои во документот, во кој, исто така, се забележува дека во некои земји водата од бунарите е понепогодна за пиење од езерската вода, на пример!
Извештајот повикува на поголемо учество на приватниот сектор во снабдувањето со вода за пиење во градовите, каде што е полесно да се вратат трошоците.
Агенцијата Анадолија објави дека само во Нигерија, 3,6 милиони луѓе не можат да ги задоволат своите основни потреби за чиста вода! Според соопштението на УНИЦЕФ, 75 отсто од мрежата за чиста вода во земјата е оштетена во судирите меѓу организацијата „Боко Харам“ и војската. Податоците на УНИЦЕФ обелоденуваат дека 30 милиони лица, од кои 14 милиони се деца, во северниот дел на Нигерија, во Сомалија, Јужен Судан и во Јемен, имаат итна потреба од чиста вода.
За жал, и Македонија не „заостанува“ зад земјите кои имаат проблем со чистата вода, или пак, со водоснабдувањето воопшто.
Само во летниот период, ЦИВИЛ Медиа пишуваше за проблемите на Струга, Арачиново, Раштак, Паљурци и воопшто, за недостигот на вода низ целата земја. Посебен проблем е Гевгелија, каде граѓанското здружение „Арсена“ со години наназад предупредува за неисправноста на водата, поткрепено со неколку потврди од меѓународни лаборатории, за што здружението и официјално побара намалување на цената за водата поради нејзината неисправност и зголемена концентрација на арсен.