За растот на бројот на ново заразени со корона вирусот, не се виновни граѓаните туку институциите кои во албанските населени места претежно се раководат од ДУИ, и политичките структури кои калкулираа со празникот Бајрам, за политички поени. Ова го изјави денеска претседателот на ДПА, Мендух Тачи, кој побара одговорност од политичарите и носителите на функции. Тој побара Бујар Османи да се острани од јавноста кога се зборува за корона вирусот, и во Тетово да се формира нов локален штаб предводен од професионалци, оценувајќи дека актуелниот не успеал да се справува со ситуацијата.
„Ситуацијата е лоша и воопшто нема да се сложам со политичките партии дека граѓаните не се дисциплинирани, ова се случува затоа што институциите не функционират како што треба, особено во средините каде што се Албанците и каде апсолутната власт, било централна, било локална ја држат ДУИ. Трето калкулациите што се направија за Бајрамот од политички структури за да добиваат поени, и ги гледам сега ниеден од нив не се појавува да ни каже зашто таков пристап имавме. Дали оваа ситуација во која сите политички партии трчат за поени затоа што треба да имаме многу брзо избори, сигурно е тоа”, изјави Тачи од партиското седиште во Тетово.
Тој обвини дека нивните препораки и барања не биле прифатени и дел од истите ги повтори и на денешната прес конференција. Првиот човек на ДПА, побара повеќе тестирања и болничка изолација на контактите на заразените со КОВИД19.
„Ние повторно инсистираме на нашите барања. Прво поголем број тестирања и тоа кај таргетирани групи каде има заразени. Второ, сите тие што се контакти на позитивните пациенти, не да се остават дома и да се изолират, туку брзо да се градат нови болници во спортски сали каде луѓето што немаат ќе се сместуваат. Трето е многу важно да се констатира дека Македонија на жалост е убедливо на прво место во Балканот, не знам дали во Европа ќе бидеме, и со број на случаи и со смртни случаи. Очигледно тука нешто не функционира”, изјави Тачи.
Тој ги повика граѓаните да не паничат и да не ги стигматизираат заболените од корона вирусот, туку напротив, на истите да им помагат според можностите. Истовремено тој упати апел да се почитуваат препораките и мерките за заштита.
А.З.
