Талибанците го убиле лидерот на ќелијата на Исламската држава одговорна за самоубиствениот бомбашки напад на аеродромот во Кабул, Авганистан, во август 2021 година, во кој загинаа 13 американски војници и дури 170 цивили, соопшти Белата куќа. Не е јасно дали талибанците конкретно ги таргетирале бунтовниците, изјавија официјални лица.
Како што пренесува Њу Јорк Тајмс, врз основа на доверливите разузнавачки извештаи – најверојатно од информатори, електронски пресретнувања или информации од сојузничките шпионски служби – аналитичарите заклучија со „висока доверба“ дека главниот заговорник на нападот на аеродромот е убиен, велат официјални лица. Тоа беше „уште една во низата загуби на раководството од висок профил“ што ќелијата на Исламската држава ја претрпе оваа година, рече Џон Кирби, портпарол на Советот за национална безбедност.
Администрацијата на САД вчера почна да ги повикува роднините на американските војници кои загинаа во нападот за да им кажат дека лидерот бил убиен од талибанските безбедносни сили во последните неколку недели. Според членовите на семејството, официјалните лица не навлегле во детали за операцијата.
Евакуацијата од Авганистан во 2021 година и нејзините последици продолжуваат да бидат предмет на жестока дебата на Капитол Хил. Републиканските пратеници ја обвинија администрацијата на Бајден дека е директно одговорна за неуспесите на излезот и ги осудија службениците на администрацијата како недоветни кога станува збор за иднината на антитерористичките операции во Авганистан.
Подготви: Д. Мишев