„Граѓанското новинарство не е како професионалното новинарство туку благодарение на новата ера на брза комуникација, односно граѓаните со своите мобилни телефони имаат можност да известуваат за појавите што секојдневно се случуваат околу нив“, вели граѓанскиот новинар Дамјан Темков.
Преку граѓанското новинарство има можност да се прикажат сите аномалии и девијации во општеството, односно дополнително разоткривање на проблемите што ги имаме, и сметам дека е добра алатка и начин како луѓето да помогнат во секојдневието во различни ситуации.
Доколку станува збор за лажни вести или говорот на омраза може многу лесно да се провери таа информација, и да се види дали е тоа навистина така, односно да биде брзо детектирано, видено и разоткриено, особено во локалните средини. Но, не треба само да биде детектирано и да биде последната алка во приказната, туку треба да реагираат институциите и мислам дека тоа е најголемиот недостаток во сегашната ситуација бидејќи гледаме дека многу луѓе се активни како граѓански новинари, меѓутоа, таму завршува приказната и нема никакво дејство од властите кои треба тоа да го санкционираат.
Со граѓанското новинарство почнав да се занимавам откако снимав како работници работат на топло, и таа информација силно одекна и престана да се работи на жешкото време. Меѓутоа, има доста информации кои се објавуваат од граѓанските новинари како што е несовесно паркирање, ѓубре… но тоа останува само вест и лајкови на социјалните мрежи. Институциите, односно полицијата треба сериозно да работат и да ги санкционираат тие што треба.
Треба да има соработка меѓу институциите и тие што објавуваат информации, како што е ЦИВИЛ или некоја друга организација.
Мојата соработка со ЦИВИЛ беше сосема случајна и во текот на изминатиов период добив неколку награди за граѓанско новинарство, што се доста поттикнувачки да продолжам да објавувам стории. Но, треба да има некоков ефект и реакција од институциите од тие стории, бидејќи ако остане само на ЦИВИЛ и на лајкови, нема да има никаква поента.
Maja Ивановска
Текст и камера: Дехран Муратов
Монтажа: Биљана Јордановска
Фотографија: Mарија Вишинова