Точно на пладне денеска на иницијатива на премиерот Христијан Мицкоски во Клубот на пратениците ќе се одржи лидерска средба на парламентарните партии.
Како што е најавено, според дневниот ред на средбата ќе се разговара за клучни реформските закони во правосудството, изборот на народен правобранител, измените на Изборниот законик, можноста за укинување на техничката влада, како и за други прашања предложени од учесниците.
За првпат лидерска средба без главната опозициска партија
Претседателот на СДСМ, Венко Филипче, единствен го одби повикот, со став дека техничката влада мора да остане како гарант за фер избори.
За разлика од СДСМ, ДУИ одлучи да биде присутна на средбата и тоа го оцени како израз на партиска одговорност и државотворност. Од Мала Речица потенцираат дека Генералниот совет на ДУИ со целосен консензус донел одлука партискиот претседател Али Ахмети да учествува на лидерската средба.
Од коалициските партнери во Владата, на средбата се очекува да присуствуваат претседателот на ЗНАМ и градоначалник на Куманово, Максим Димитриевски, како и претставник од коалицијата „Вреди“, Биљал Касами. Учество на средбата потврди и претседателот на Левица, Димитар Апасиев, Лидерската средба ја поздравија и ЛДП и ДОМ.
СДСМ: Средбата го легитимира криминалот и корупцијата
Во соопштение до јавноста, СДСМ остро реагираше на најавената средба, оценувајќи дека секој што ќе учествува на разговорите за укинување на техничката влада станува соучесник во легитимирање на криминалот и корупцијата на тендер коалицијата ВМРО-ЗНАМ, спроведување на анти-ЕУ кампања за изолација на земјата, план за предвремени избори без основни услови за фер и демократски процес и реализација на планот „мигранти за пари“.
„Сите чекори што власта досега ги презема веќе ги најавивме – изолација, избори, мигранти за пари. Секој што ќе отиде на средбата со Мицкоски не може подоцна да каже дека не бил соучесник“, се наведува во соопштението.
Од СДСМ додаваат дека партијата останува со граѓаните и, како што истакнуваат, на вистинската страна – на страната на Македонија, на страната на интеграцијата, на фронтот за правда и против корупцијата и криминалот.
Мицкоски жали за одлуката на СДСМ, Левица условува
Премиерот Мицкоски изрази жалење за одлуката на СДСМ, нагласувајќи дека сакал инклузивен процес.
„Тема на лидерската средба е само Законот за Владата. Ако ние се однесуваме неодговорно, како што се однесува тој, нам не ни е потребна лидерска средба, ние со 61 глас може да ја избришеме техничката влада“, рече Мицкоски.
Левица најави присуство, но со услов укинувањето на техничката влада да оди во пакет со една изборна единица. „Сметаме дека сега е времето да влеземе во конструктивен дијалог“, изјави пратеникот Амар Мециновиќ.
М. Д,
