На 24 февруари оваа година се навршуваат три години откако Русија ја започна својата целосна инвазија против Украина, ескалирајќи ја војната која започна во 2014 со анексијата на Крим и окупацијата на делови од Донбас, вклучувајќи ги Донецк и Луганск. Војната предизвика огромна деструкција, човечко страдање и огромен број воени злосторства кои се документирани.
Украинското јавно обвинителство регистрира повеќе од 150.000 случаи на воени злосторства од почетокот на целосната инвазија. Овие злосторства вклучуваат мачење и егзекуции на цивили, вклучувајќи деца, жени и стари лица, егзекуции на воени затвореници, бомбардирање болници, училишта и градинки, сексуално насилство, и бројни други ужасни воени злосторства.
Едно од најтешките злосторства е киднапирањето на 20.000 украински деца, кои се принудно однесени во Русија или во окупираните територии. Тие се подложени на принудна русификација во таканаречените „кампови за превоспитување“.
На 17 март 2023 година, Меѓународниот кривичен суд (МКС) издаде налог за апсење на Владимир Путин, претседателот на Русија, и Марија Лвова-Белова, рускаата комесарка за права на децата, за незаконска депортација и пренос на деца, што е воено злосторство според меѓународното право. Налогот против Путин е прв во историјата издаден против лидер на постојан член на Советот за безбедност на Обединетите нации.
Војната предизвика огромни штети и на инфраструктурата, со целосно уништени градови и села. Илјадници цивилни објекти, вклучувајќи домови, културни објекти и енергетски капацитети, беа и се цел на нападите. Милиони Украинци се раселени, создавајќи една од најголемите бегалски кризи во современата историја.
Три години по започнувањето на целосната инвазија од Путин, Украина се соочува со нови предизвици. Претседателот на САД, Доналд Трамп, предизвика шок ширум светот со својата очигледно проруска позиција. Тој го нападна украинскиот претседател Володимир Зеленски, нарекувајќи го „диктатор“ и погрешно обвинувајќи ја Украина за „започнување“ на војната.
Сега, Украина и нејзините поддржувачи водат нов фронт. Покрај борбата со руските агресори од исток, започна нова битка – со Трамп, кој дословно ги повторува лажните изјави на Путин.
И покрај тешките последици и новите предизвици, Украина продолжува да се бори, поддржана од голем број нации и слободољубиви луѓе низ Европа и светот.
Џ. Д.
