Со новата концепција за основно образование за прв пат се воспоставуваат национални стандарди со кои се определуваат компетенциите што треба да ги стекнат учениците во текот на деветолетката. Досега целото образование беше содржински насочено, а за прв пат се воспоставува образование коешто ќе гледа резултати од учење, што е меѓународен стандард, рече министерката за образование и наука Мила Царовска.
Нашите национални стандарди се изготвуваат врз основа на рамката што ја дава ОЕЦД. Министерката Царовска објасни дека националните стандарди се однесуваат на осум подрачја околу кои се групирани компетенциите, и тие се јазична писменост; користење други јазици; математика, природни науки и технологија; дигитална писменост; личен и социјален развој; демократска култура и граѓанство; претприемништво и уметничко изразување, култура и мултикултура.
-Ова се осумте национални стандарди коишто секое дете ќе треба да ги има во моментот кога ќе излезе од деветолетка, рече Царовска во синоќешното интервју за Сител.
Создаваме групирање на основни предмети за да може секој ученик да ги постигне како компетенции, објасни министерката. Но, секој ученик, за да може да го постигне својот основен потенцијал, бира два изборни предмети во текот на годината, по еден во полугодие. Изборните предмети се од четири поглавја: дополнувања на знаења од основните предмети, други вештини како градинарство, готвење, техничко образование, потоа спортски активности и поглавје за личен развој.
-За прв пат и како стандард се воведува личен развој. Зошто? Затоа што воспитанието беше многу запуштено. Сега го враќаме назад. Со изборниот предмет ученикот го надополнува образованието и учествува во креирање на својот образовен план во деветтолетка, рече Царовска.
Учениците ќе бидат минимум шест часа во училиште, за да може покрај часовите по основните предмети да имаат и дополнителни активности.
-Она што е видливо, е дека на образовниот систем му е потребна итна реформа и реорганизација. Исто, јасно е видливо дека не е вложувано многу години, дека не е усогласено со потребите на современото живеење, ниту во општо образовните програми, ниту во стручните програми, и токму затоа, како министерство за образование наука интензивно се подготвуваме за реформа, и во основно, и во гимназиско и во средно стручно образование, затоа што ако не се преземат активности сега, сметам дека во наредните пет години огромен човечки потенцијал уште повеќе ќе биде забележително дека го губиме. Не само напуштајќи ја државата туку и капацитетот што ќе остане тука, нема да може да одговори на потребите на пазарот на трудот, изјави министерката Царовска во интервју за ЦИВИЛ Медиа, со осврнување на состојбите на образовниот систем, приоритетите, долгогодишното партизирање на наставниот кадар, европските вредности во образовната програма и настава…
