Комисијата за избор на грантови ги оцени апликациите на организациите кои поднесоа пријава на првиот повик за институционални грантови во новата фаза на Цивика мобилитас. Добитници на институционални грантови се 15 организации што дејствуваат во 10 различни сектори и тоа најмногу во секторот на информации, комуникации и медиуми; но и во секторите за човекови права развој на граѓанското општество, владеење на правото, антикорупција, ЛГБТИ, добро владеење, животна средина, и деца, млади и студенти.
Цивика Мобилитас додели 15 институционални грантови за јакнење на организациите во период од три години, додека акциски грантови добија 12 граѓански организации. Висината на грантот за институционална поддршка од швајцарската програма Цивика Мобилитас е 4,5 милиони денари за три години, додека акциските грантови се движат од еден до 1,8 милиони денари за поединечен проект.
„Добитник на институционален грант е и ЦИВИЛ – Центар за спобода која во наредните три години ќе работи на унапредување на човековите права и слободи преку спојот на активизмот, аналитиката и медиумската продукција како дел од нејзините проектни активнсости. ЦИВИЛ е организација со долгогодишно искуство во изборните процеси и заштитата на гласачкото право“ – кажа претставничката на Цивика Мобилитас на церемонијата.
„Со ова доделување на сертификатите за новите грандисти, всушност, се дистрибуираат првите 1,5 милиони франци за спроведување на проектите од акциските грантови во наредните година/две и трите години на институционален грант“, изјави Александар Кржаловски, на денешното свечено доделување на грантовите што се одржа во хотел „Арка“.
„Во програмата на Цивика Мобилитас грантистите се сржта на целата програма. Вие сте главните што го менуваат општеството и што му давате облик на општеството“, изјави Н. Е. Сибил Сутер Тејада која ги додели сертификатите на грантистите.
За институционални грантови се пријавиле 144, а добитници се 15 граѓански организации, додека за акциски грантови се пријавиле 131, а добитници се 12 организации.
Текст, фотографија и монтажа: Биљана Јордановска
Камера: Дехран Муратов