Во пресрет на протест на ВМРО-ДПМНЕ закажан во 20 часот на 18 јуни, ЦИВИЛ – Центар за слобода ги повикува организаторите да покажат одговорност и почит кон законите и јавниот интерес. Да не се повторат грешките од минатото кога се тепаа новинари и се извикуваа ултра националистички пароли.
ЦИВИЛ со години бележи интензивен говор на омразата на социјалните мрежи и во дел од медиумите, кој е инспириран од постапките и изјавите на членови и функционери на политичките партии. Во пресрет на протестот, ЦИВИЛ го повикува водството на ВМРО-ДПМНЕ да го повика своето членство и учесниците во протестот да се воздржат од ширење на говорот на омразата и од повиците на насилство. Тоа е неприфатливо поведение што е спротивно на законите и на јавниот интерес.
ЦИВИЛ го повторува својот повик до јавноста и до политичките ентитети да престанат со поттикнување на говорот на омразата со кој може да се предизвика политичко насилство, на какво што бевме сведоци и во неодамнешното минато.
Надлежните институции се повикани да ја исполнат својата законска обврска да ги заштитат јавниот интерес, мирот и безбедноста и соодветно да ги санкционираат сите активности што излегуваат надвор од рамките на гарантираното право за мирен протест.
Исто така, ЦИВИЛ апелира и до граѓанките и граѓаните, да го отфрлат и да го осудат говорот на омразата на социјалните мрежи и во дел од медиумите.
ЦИВИЛ повикува: Кажете НЕ за говорот на омразата!
