Рим, 27 септември 2025 – ЦИВИЛ – Центар за слобода, како коосновач на Глобалната иницијатива за одбрана на демократијата (Defending Democracy Global Initiative – DDGI), ќе биде дел од јавниот настан „Одбрана на демократијата и човековите права – Од препораки кон акција“, што ќе се одржи во четврток, 2 октомври 2025 година во Рим.
Програмата, закажана од 18:30 до 20:30 часот (CET), ќе вклучи претставување на публикацијата со стратешки препораки за политики, по што ќе следи дискусија и дружење.
Настанот е дел од активностите на ДДГИ и програмата Вестминстерска алијанса за Украина, основана од Нов европски граѓански форум (New European People’s Forum – NEPF), Медија дијалог (Media Dialogue) и ЦИВИЛ – Центар за слобода, а е поддржан од Европа сега! (Europa Now!).
Според организаторите, вечерта ќе биде посветена на практичните чекори за спротивставување на дезинформациите, зајакнување на демократските институции и одбрана на човековите права. Иницијативата, исто така, ја нагласува европската одговорност за поддршка на Украина во време на растечки геополитички предизвици.
Глобалната иницијатива за одбрана на демократијата ги обединува парламентарците, граѓанското општество, академијата и медиумите ширум Европа и пошироко со цел да се промовира демократска отпорност и соработка.
ЦИВИЛ – Центар за слобода
