Петмина осомничени како организатори на настаните на 27 април, експремиерот Никола Груевски, поранешниот председател на Собранието, Трајко Велјановски, поранешните министри Миле Јанакиески и Спиро Ристовски, како и бегалецот Никола Бошковски, се лицата за кои обвинителството побара притвор со образложение дека можат да бегаат или да влијаат врз осомничените. Двајца од нив, Груевски и Бошковски веке се во бегство, а Велјановски, Јанакиески и Ристовски денеска се уапсени и изведени пред суд.
По спроведена сеопсежна предистражна постапка, како што соопшти Основното јавно обвинителство за гонење на организиран криминал и корупција, оваа интитуција издаде наредба за спроведување на истражна постапка против пет лица за кои постои основано сомневање дека сториле кривично дело – Терористичко загрозување на уставниот поредок и безбедноста, предвидено и казниво по член 313 од Кривичниот законик.
Наодите од предистражната постапка укажуваат дека осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел, тие ги организирале и материјално ги поддржале протестите прво пред Државната изборна комисија, а потоа и протестите на движењето „За заедничка Македонија“ кои кулминираа со насилното влегување во Собранието на Република Македонија на 27 април 2017 година.
Осомничените, како организатори, ја вклучиле севкупната партиска структура и материјални средства за исполнување на целта и овозможиле континуирано намалување на бројот на полициски службеници за обезбедување на протестите. Со намера да го загрозат уставниот поредок и безбедноста, на критичниот ден организирале непречено влегување на толпата во законодавниот дом, вклучиле патриотски здруженија и ангажирале лица за извршување на насилство.
Воедно, од седиштето на политичката партија, континуирано го мобилизирале членството на партијата од Скопје и другите градови. Во исто време, еден од осомничените, со возило, сопственост на Управата за безбедност и котраразузнавање, донел огнено оружје и панцирни елеци пред Собранието на Република Македонија што биле наменети за лица што протестираат и имаат искуство во ракување со оружје.
Со овие активности осомничените предизвикале чувство на несигурност, загрозување и страв кај граѓаните. Ценејќи дека се исполнети законските основи, надлежниот јавен обвинител до Судија на претходна постапка при Основниот суд Скопје 1 – Скопје достави Предлог за определување мерка притвор за осомничените.
А. Зеќири
фотографија: Киро Попов/kolektif.mk
