ДЕХРАН МУРАТОВ
Во период од само неколку месеци има повеќе убиства и обиди за убиства со огнено оружје и за жал ниту еден случај нема целосна разрешница. И додека граѓаните се чувствуваат незаштитени и небезбедни, Владата предводена од Христијан Мицкоски реши да ја врати заштитната ограда на Никола Груевски. Дали тој потег е за поголема безбедност на владините претставници или е само дефокус од реалните проблеми?
Убиства за време на ВМРО-ДПМНЕ и министерот Тошковски
- Не се знае кој го уби матичниот доктор Ацо Трповски на паркингот пред Поликлиниката Железара.
- Не е расчистен случајот кој го застрела пејачот Амар Исмани и повреди уште двајца на Пластичарска.
- Убиството во скопско Батинци се уште е неразјаснето. Полицијата се уште трага по сторителите, од крушуми од калашников беше убиен 34-годишниот Абдил Ибрахими, а повреден беше 31-годишниот сопатник во неговиот автомобил, за кој се верува дека е негови брат.
- На 5 јули, во Тетово е ликвидиран лицето со иницијали Р.Т.(39). И овој случај не е расчистен.
- Остава сомнеж и случајот со починатото 24 годишно момче кој пред да подлегне на повредите од пожарот изјавил дека бил киднапиран во Ченто и натеран присилно да се замозапали во Ќојлија. Истрагата на полицијата утврди дека 24 годишниот Б.А. лажел, односно дека тој со запалива течност го полеал контејнерот на агенцијата за рент-а-кар во Ќојлија и го запалил, при што од настанатата експлозија, кај него настанале повреди по телото-изгореници, од кои на 7 јули оваа година тој починал.
- Почина бизнисменот Чедомир Радомировиќ, кој вчера беше пронајден во скопското с. Орман со повреди на главата, а покрај него имало пиштол и чаураи. Не се знае дали е убиство, самоубиство, или несреќен случај.
- Основното јавно обвинителство Кичево донесе Наредба за спроведување истражна постапка против 21-годишник од с. Суви Дол, Македонски Брод, кој во двор на куќа во селото Калуѓерец со ловна пушка уби 31-годишен професионален војник во АРМ.
Ова се само дел од случаите кои беа актуелни во изминатите месеци.
Од опозициската партија СДСМ велат дека состојбата со убиствата станува алармантна, а безбедноста на граѓаните е во ризик поради постојаните пукања.
„Македонија станува сцена од каубојски филм каде убиствата и уличните пресметки се секојдневие. Најстрашно е што нема разрешница на ниедно убиство во последните шест месеци откако Тошковски и ВМРО-ДПМНЕ раководат со МВР. Оваа неспособност на МВР е загрижувачка и ги охрабрува криминалците. Додека Мицкоски се сили како наводно криминлаците се плашеле од него, државата заличува на предградие на мексикански град каде владеат картелите“, велат од СДСМ.
Горенаведените убиства се случуваат во време кога министер за внатрешни работи е Тошковски од редовите на ВМРО-ДПМНЕ.
Убиства во време на СДСМ и ексминистерот Спасовски (2023 година)
Во „Шиша бар“ на 6 март, убиени се Јетон Кривањева-Жила и Есен Исеинов-Љаци.
Три месеца подоцна, во Приштина е убиен Бљерим Даци, македонски државјанин од Чаир, а неговото безживотно тело беше најдено во автомобил со македонски регистерски таблици.
Нешто подоцна, на 15 јули во Халкидики, Грција, е убиен Орхан Бајрами-Оки, а неговиот пријател Сеад Слезовиќ бил повреден.
Во почетокот на оваа година во близина на локалниот пат од Долно кон Горно Блаце, убиен е Н.Т. таткото на Гани Туша, лицето кое се наоѓа во затвор поради убиството на Орхан Бајрами – Оки. Пред убиството имало пожар во кафулето „Барон“.
Во „Ист Гејт“ на 24 октомври е пукано кон Раде Трајковски Штекли, но беше само повреден. Кон него, на истото место беше пукано и два месеца порано, на 25 август, но не беше погоден.
Случајот што ја шокираше јавноста
Основачот на Десна, Љупчо Палевски Палчо е првоосомничениот за убиството на 14-годишната Вања Ѓорчевска и Панче Жежовски.
Обвинението се заснова на усни и материјални докази за дејствијата на обвинетите, но бидејќи продолжува постапката против првоосомничениот Палевски, кој неодамна беше екстрадиран од Република Турција, Јавното обвинителство не соопштува детали за доказите.
Да потсетиме, малата Вања беше пријавена за исчезната на 27 ноември, а Панче од Велес на 24 ноември 2023. Нивните тела беа пронајдени на 3 декември. Во врска со двата случаи осомничени се пет лица, од кои тројца (Влатко Кешишов, Велибор Манев и Боре Видевски) ја признаа вината.
Тепачки, вандализам, насилство…
Но, покрај убиствата, има серија на масовни тепачки, како што беше случајот во Злокуќани или во Штип.
Јавноста беше згрозена и од видеоснимките на кои млади лица насилно се однесуваат и кршат реквизити на детски игралишта.
Справувањето со девијантното однесување кај младите бара поширока кампања, истакна проф. д-р Татјана Стојаноска Иванова од Институт за социологија при Филозофскиот факултет при средбата со градоначалникот на Општина Центар, Горан Герасимовски.
– Решението за девијантните појави и однесување кај младите бара поширока кампања во која не
треба да бидат вклучени само стручни лица, туку треба да има општа мобилизација и работа не
само со децата, туку и со родителите за да имаме резултати, рече Иванова.
Справувањето со вандализмот бара законски измени кои ќе ги предложиме до ЗЕЛС, истакна Герасимовски.
ЦИВИЛ МЕДИА
