На 24 февруари 2025 година, Генералното собрание на ОН усвои резолуција „Унапредување на сеопфатен, праведен и одржлив мир во Украина“, која претставува уште еден цврст сигнал од меѓународната заедница во поддршка на суверенитетот, независноста, единството и територијалниот интегритет на Украина во нејзините меѓународно признати граници, вклучувајќи ги и нејзините територијални води. 93 држави гласаа „за“, 18 „против“, а 65 држави се воздржаа, соопшти Министерството за надворешни работи на Украина.
„Го поздравуваме усвојувањето на овој документ, со кој земјите-членки на ОН ја потенцираат неопходноста од постигнување на сеопфатен, праведен и одржлив мир во Украина во согласност со Повелбата на ОН, вклучително и нејзините принципи на суверена еднаквост и територијален интегритет на државите, како што е нагласено во резолуцијата ES-11/6 од 23 февруари 2023 година“, пишува во соопштението на украинското МНР.
Понатаму, во соопштението се истакнува фактот дека Генералното собрание на ОН ја нагласи потребата од целосно исполнување на нејзиното барање до Руската Федерација – веднаш, целосно и безусловно да ги повлече сите свои вооружени сили од територијата на Украина во нејзините меѓународно признати граници, како и нејзиното барање да престанат воените дејствија на Руската Федерација против Украина, особено нападите врз цивилното население и цивилните објекти.
МНР на Украина го издвојува и делот во Резолуцијата во кој беше упатен повик за итен прекин на нападите врз критичната енергетска инфраструктура, кои го зголемуваат ризикот од нуклеарни несреќи или инциденти.
„Усвоената резолуција ја потврдува потребата од обезбедување одговорност за најтешките злосторства, извршени на територијата на Украина, во согласност со меѓународното право, преку спроведување соодветни, праведни и независни истраги и судски постапки на национално или меѓународно ниво, како и обезбедување правда за сите жртви и спречување на идни злосторства“, се вели во соопштението.
МНР на Украина изрази благодарност до државите-членки на ОН кои го поддржаа овој документ во контекст на сложената геополитичка ситуација и тензиите што се чувствуваа во Генералното собрание на ОН.
„Ви благодариме за принципиелноста во одбрана на принципите и вистината, и покрај притисокот од некои влијателни држави-членки и нивните барања да не се гласа за резолуцијата предложена од Украина и нејзините партнери“, пишува во соопштението.
Според Министерот за надворешни работи, Андриј Сибига, и покрај сите пречки, украинската дипломатија ја докажа својата способност да ги брани принципите и вистината.
Понатаму во соопштението се потенцира дека Министерот за надворешни работи на Украина изрази благодарност до европските колеги за заедничката дипломатска работа и истакна дека денешното гласање ја покажа новата сила на Европа и сите истомисленици што навистина го почитуваат меѓународното право и Повелбата на ОН.
Министерството за надворешни работи на Украина им е благодарно на сите партнери што вложуваат напори за постигнување мир во согласност со Повелбата на ОН и меѓународното право. Украина, заедно со меѓународната заедница, ќе продолжи да работи на спроведување на одредбите од оваа резолуција, соопшти Министерството за надворешни работи на Украина.
