Најмалку триесет севернокорејски војници билe убиени или ранети за време на напади во руската област Курск, тврди украинското воено разузнавање (ХУР) во извештајот од 16 декември.
По нападите што се случија на 14-15 декември во близина на селата Плиехово, Ворожба и Мартиновка, севернокорејските загуби треба да се надополнат со нови војници од 94-та одделна бригада на Северна Кореја, тврди ХУР. Тројца војници, исто така, наводно исчезнале.
Кијив Индипендент не можеше самостојно да ги потврди тврдењата на ХУР.
Украинските и западните претставници есента предупредија дека над 10.000 севернокорејски војници се стационирани во Курската област, подготвени да помогнат во обидот на Русија да ги собори украинските сили во регионот. Овој потег претставува невидена ескалација во руската војна против Украина.
Првите ограничени судири меѓу севернокорејските и украинските трупи во Курската област беа пријавени на почетокот на ноември, при што севернокорејските војници неодамна се приклучија на операциите за копнени напади.
Севернокорејските трупи, исто така, наводно отвориле оган и убиле осум руски војници на 14 декември во инцидент со „пријателски оган“.
За време на борбите во Курската област, група севернокорејски војници отвориле оган врз членовите на чеченската единица Ахмат што се борат за Русија, објави ХУР преку својот официјален канал Телеграма. Според извештајот, кој Кијив Индипендент не беше во можност да го потврди, во нападот наводно загинале осум руски војници.
Според ХУР, инцидентот е резултат на јазичната бариера меѓу руските и севернокорејските трупи, која продолжува да биде „тешка пречка“ на бојното поле.
Руската војска воспостави специјални протоколи на местата каде што се наоѓа севернокорејскиот персонал, соопшти ХУР. Руските војници мора да бидат подложени на инспекција пред да влезат во овие области, а телефоните и електронските уреди им се одземени.
Претходно претседателот Володимир Зеленски објави дека „значителен број“ севернокорејски војници им се приклучиле на руските јуришни операции во регионот Курск и дека севернокорејскиот персонал почнал да има „забележителни загуби“, но не даде бројка.
Драган Мишев
