ЉУБОМИР КОСТОВСКИ
Како е украсен московскиот Арбат? Ова беше единствената веста на главната најава за првиот, понеделнички преглед на вести на Телма, емитувани во 8 часот. Треба да се каже дека во поново време оваа ТВ куќа ги засили своите амбиции во емитување на политичките њуз – производи и тоа е секако за поздравување. Наутро постојат три обемни прегледи на вести од дома и странство и тоа во 8, во 10 и 12,30 часот. И пак да се вратиме во главната најава за вестите во 8 часот – како е убаво украсена Москва во овие предновогодишни денови.
Мислев дека во контекст на сликите од улицата Арбат постои некаква иронија или просто споредба со она што се случува надвор од главниот град, поблиску до фронтот, сместена е некаква паралела со она што се случува во градовите на Украина што се под засилен оган на руската артилерија, особено по одбивањето на Путин да направи макар и симболичен прекин на огнот (во Украина се слави Божиќ по грегоријанскиот календар). Да споменеме дека и во крвавата Прва светска војна на Божиќ 1914 година војниците од двете страна на западниот фронт (Англичаните и Французите од една страна и Германците од друга страна) накратко го прекинале огнот и се ракувале и си го честитале празникот.
Дури импровизирале и фудбалски мечеви.
Добро, Путин и при интензивните мировни преговори сака да остави впечаток на супериорност и да речеме – рамнодушност дали ќе дојде до мир. Особено за тоа има и потреби да го импресионира својот народ. И гледаме сега и сами како – нуди украсени елки на улиците на Москва, полни тезги со портокали, што од време на социјализмот е врвен израз на потрошувачкиот „луксуз“. Знаеме дека луѓето, особено оние од Сибир, патувале по стотина километри ако случајно им ветувале дека ќе можат да купат по килограм од овие јужни овошја. Сега москвичите се мерат на вага пред тезгите и таа им кажува по колку парчиња на портокали можеле да добијат!
Одлично, тоа е голем на предок за стандардот на обичниот човек таму, но што тоа ни кажува нам, особено зошто тоа е вест во најава и со централно место во овие вести? Па и нам треба да ни биде упатена слична порака – во Русија е се во ред, ние си имаме проблем што сме од другата страна, онаа на вистината и реалните дострели на руската инвазија која трае од 2014 година – цели 11 години веќе. Путин, тоа го нема во прилогот секако, одбила да го прекине огнот и да се спроведе референдум дали населението во окупираните подрачја сакаат да живеат во старата држава – Украина или да се согласат да добијат трајни руски пасоши?
Колку и да е тој предлог во основа на страната на окупаторот, бидејќи таму населението е главно раселено и подложено на русификација, Путин и тоа го одбива: зошто да ризикува? Нему и онака не му е битно расположението на плебсот…
Да, секако дека вестите за преговорите околу руската агресија и потенцијалниот мир, што викендов се одвиваа во Белата куќа, каде допатува украинскиот претседател Зеленски се за ударните вести ама зошто сега ние како гледачи треба да добиеме утринско „предјадење“ во форма на наводното луксузирање на жителите на главниот град на окупаторот, каде инаку, во реалноста, патниците кои се упатуваат кон било кој од трите московски аеродроми и во овие часови мораат да доживеат сирени на возбудување, одложување на летовите, по 300 на ден, па и сокривање во простории за таква намена. Не, секако, во ваквите пропагандни прилози постои сосема спротивна интенција.
Од каде таа интенција „долетала“ во нашите домови преку Телма. Не сме секако наивни. Некаде, веројатно надвор од нашите граници, некои деловни луѓе отвораат во тие моменти шише со вотка и наздравуваат за соработка во 2026 година. Тој мотив веројатно може да се протне токму во оваа ТВ куќа! Ако е таа цената на прилогот треба ли да имаме разбирање?!
Патем мојот кус и брз преглед на вестите на другите ТВ станици присутни во нашиот етер рано утринава, како главна вест ги содржеше сликите на дечињата Палестинци кои трчаат кон места каде паѓаат скромен број на падобрани што треба да донесат по некој мизерен оброк за тој напатен народ. Во исто време нивните родители се обидуваат да најдат ново место за прокиснатите шатори или да ги погребуваат бебињата кои умираат од хипотермија… Ја имаше оваа вест во тој утрински колаж на настани на Телма ама беше ставена сосема на крајот на получасовното траење. Да не ни ја расипе сликата за украсениот Арбат.
(Во вестите имаше сосема други прилози кои заслужуваа главна најава – разговор со професорот Узунов за сиромаштијата во земјава според Џини методот, да речеме или за пропаста на сточарството во Македонија што предизвикува вистинска криза во снабдувањето со млеко а особено со млечни производи ама тие се турнати од „излогот“) .
