„Упад на полицијата во домот на директорката на СОУ „Крсте Петков Мисирков“ во Демир Хисар, Маја Лозановска, е уште една потврда дека режимот се врати, објавуваат од СДСМ.
Оттаму велат дека „ова е сликата на секој режим, полиција ставена во функција на политички притисок и незаконско разрешување на директорка во средно училиште, со единствена цел пред избори да постават партиски кадар на ВМРО-ДПМНЕ“.
Во партиското соопштение се истакнува дека „сега на граѓаните им е кристално јасно зошто беа измените на Законот за полиција и Законот за внатрешни работи кои ги спроведе Панче Тошковски, за целосна партизација на полицијата, политички прогон и злоупотреба во партиски цели на ВМОР-ДПМНЕ“.
Од СДСМ нагласуваат дека „полицијата станува продолжена рака на ВМРО-ДПМНЕ, а жртви се граѓаните . Денеска е директорка на средно училиште утре некој друг“.
СДСМ бара веднаш да престане, како што велат, бруталниот притисок и незаконското разрешување на директорката Маја Лозановска. Законите мора да се почитуваат без разлика за кого станува збор.
Бараме одговорност од сите кои ја извршуваат оваа незаконска постапка и кои дозволија ставање на полицијата во служба на политички прогон, се наведува во реакцијата од СДСМ, пишува Фронтлајн.
„Еве како се менува доректор на средно училиште пред распишување на избори. Макар и на носилки на информативен разговор…“, пишува адвокатот Стеваноски.
Директорката Маја Лозановска за Слободен печат вели дека градоначалникот сега на ден пред распишување на локалните избори се обидел по трет пат да ја разрешува за да успее директорката која тој ја поставил да потпише решенија за прием на тројца наставници по избор на партијата. Тој го вклучил обвинителството кое дало налог на полицијата да направи претрес и да и ги одземе печатите. Била викната и брза помош во домот на Лозановска која е на боледување и лекарката констатирала дека има притисок 160 со 100 и не е во состојба да оди во полицијата на информативен разговор а инспекторот се заканил или да дојде сама или ќе биде приведена и однесена во полиција.
Во моментов во училиштето сите користат колективен одмор, а во меѓувреме таа извадила и боледување поради здравствени проблеми со грбот.
Адвокатот на директорката Лозановска, Жарко Стеваноски во видео објава на Фејсбук синоќа го прикажа односот на полицијата после претресот од страна на инспекторите во домот на директорката.
